"الحريفة" من أحدث أفلام السينما المصرية، فيلم شبابي بطله الفنان الصاعد بقوة نور النبوي، اللي مش بس أثبت إن "ابن الوزعوام"، متوقع إنه يفتح الباب لنوع جديد من السينما الشبابية، ويتصدر شباكها في السنين الجاية.

إحنا في "كلام القاهرة" روحنا واتفرجنا على الفيلم مع أبطاله في العرض الخاص، وهنقول لكم على  5 حاجات عجبتنا من غير ما نحرق لكم الأحداث:

1- روح "الحريفة" ماشوفنهاش على شاشة السينما من فترة، حاجة كده زي فيلم "أوقات فراغ" بس نسخة 2024 بكل تفاصيلها مشاكلها وأغانيها.

2- اللي متابع خطوات "نور" هيلمس أد إيه نضج فنيًا، ويستحق يشيل فيلم لوحده، وهنا نقصد أدوات الممثل سواء كان حركة جسمه أو نظرات عينيه في المشاهد المختلفة.

3- اللطيف في "الحريفة" إنه مليان مفاجأت، وأهمها "ميدو" كابتن مصر السابق، بنشوفه كا ممثل لأول مرة، وروح الكابتن طاغية عليه، وده بيرجعنا لأيام بطولاته.

4- مؤدي المهرجانات "كزبرة" فاكهة الفيلم، تلقائي وطبيعي تحسه ما بيمثلش، بالمناسبة اسمه في الفيلم "حتة"، والسر وراء الاسم ده مش محدش يتوقعه، بس هتعرفوا جه منين لما تشوفوا الفيلم.

5- نختم كلامنا بـ "الششتاوي" أو أحمد غزي هيروح في حتة تانية خالص بعد "الحريفة"، هتحس إنك عايز تشوفه مشاهده على الشاشة أكتر من كتر ما هي معمولة بـ حرفنة.