كل واحد فينا جواه حدوتة، حلوة بقى ولا ملتوتة، الأكيد إنها هتفضل ملزماك طول حياتك، مواقف وقصص ومشاعر بتتخزن جواك من طفولتك، وبتفاجأك بتفاصيلها وأنت ماشي في مشوار حياتك بشكل ماتتخيلوش.

إحنا في "كلام القاهرة" روحنا واتفرجنا على الفيلم مع أبطاله أحمد حلمي وأمينة خليل، وهنقول لكم على 5 حاجات عجبتنا من غير ما نحرق لكم الأحداث:

أداء أحمد حلمي

ممدوح أو حدوتة أو حتى ديدي، حلمي قدر يقدم ميكس شخصيات متناقضة جوه شخص واحد، صحيح كان مخبي الجزء الطيب فيه وراء نبرة صوته ومشيته، لكن طبعًا هتصدقه جدًا وتحس كمان إنك قابلته قبل كده.

مقابلة البطل لنفسه وهو صغير

من أمتع المشاهد اللي هتشوفوها، ويمكن دي نقطة اختلاف قوية تحتسب للفيلم ده عن باقي الأفلام اللي اتعودنا عليها، ومع إن البطل حاول يهرب من نفسه كتير، لكن بطريقة كوميدية كده اضطر يواجه نفسه ويحل مشاكل الماضي علشان يحمي نفسه.

هتحس إنك حجزت سيشن مع معالج نفسي

لو مكنتش تعرف حاجة عن جلسات العلاج النفسي، احتمال كبير تغير رأيك بعد ما تتفرج على "حدوتة"، ويمكن أنت كمان يعدي قدامك شريط مخاوفك، وتمشي وراها لحد ما تعالجها وطبعًا بالطريقة الصح، وهتبقى محظوظ لو قابلت معالجة زي "هدى" وشطارتها.

قصة الفيلم واقعية وقريبة للمشاهد

مشهد وراء التاني، جايز الحدوتة تلمس حتة فيك مكنتش واخد بالك منها أصلًا، الأحداث واقعية وحصلت وبتحصل تقريبًا كل يوم، متقدرش ننكر الجزء الكوميدي اللي زود لذاذة الفيلم، لكن القصة مش بعيدة خالص.

رسايل الفيلم اللي مبتخلصش

خلينا نعترف أن حجم الوعي في السنين اللي فاتت مكنش أحسن حاجة، ومكنش حد عارف يعني ايه مشاكل الطفولة ولا جرح الرفض ومصطلح التنمر وغيره غيره، وهنا بيجي دور الفيلم، واللي بشكل مباشر وغير مباشر هـ يوعي كتير من الأهالي في تربية ولادهم، وكمان هيعرفك حاجات عن نفسك.