نجوم كتير بيواجهوا تحدي الالتزام بالشغل في عز حزنهم، خاصة مع فقد حد من أهلهم، بيختاروا أنهم يكملوا شغلهم ويلتزموا بمواعيدهم مع الجمهور سواء على المسرح أو في تصوير أعمالهم.
ورغم أن الحداد سبب مقبول للابتعاد عن العمل، إلا أن كتير من الفنانين ما استسلموش للألم، وقرروا يظهروا باحترافية وقوة في تجاوز اللحظات الصعبة.
كارول سماحة
كسرت حالة الحداد بعد وفاة جوزها، ورجعت تاني للشغل وشاركت في مسرحية "كلو مسموح" اللي بدأت عروضها في بيروت، رغم وجعها، قررت ترجع بسرعة علشان الالتزامات الكبيرة اللي في العرض، وتأجيله قبل كده بسبب الوفاة، فاختارت تكمل وتواجه حزنها بالشغل.
مي عز الدين
واجهت أصعب لحظات حياتها بعد وفاة والدتها في نوفمبر اللي فات، خصوصًا إن علاقتها بيها كانت قوية جدًا، ودا باين من حبها ليها طول السنين، وبعد إلحاح من إصدقائها رجعت تشتغل وبدأت تصوير مسلسل "قلبي ومفتاحه، اللي عرض في رمضان، ووجهت شكر لكل اللي وقفوا جنبها وقتها.
مصطفى شعبان
بعد الصدمة اللي مر بيه مصطفى شعبان، بسبب وفاة أخوه الصغيرماجد، قرر يرجع لتصوير مسلسله "حكيم باشا" بعد أيام من الوفاة، مصطفى أصر إنه يكمل شغله ويرجع اللوكيشن علشان يلتزم بمواعيد التصوير ويلحق العرض في موسم رمضان 2025.
عادل إمام
عرف بوفاة والده وهو في لبنان بيقدم عرض مسرحي، ورغم الألم، قرر يكمل العرض وما أجلهوش، وقف على المسرح وكلم الجمهور لحظات عن والده، وسط دعم وتصفيق من الناس، وبعدها رجع على مصر.
ده ماكنش الموقف الصعب الوحيد في حياة عادل إمام على المسرح، وقت وفاة مصطفى متولي – جوز أخته وأحد أبطال مسرحية "بودي جارد" – الزعيم رغم الحزن الكبير، أصر يطلع على المسرح في نفس الليلة، وحسب كلام رامي إمام، كل الفريق انهار من البكاء بعد العرض، وعادل إمام نفسه فضل يبكي بطريقة عمره ما شافه بيها قبل كده.
شيرين عبد الوهاب
تحدت الحزن بعد فقدان والدها، وقررت العودة لمواصلة مسيرتها الفنية، بعد شهرين من التأثر الكبير، وأحيت شيرين عدة حفلات، كان أولها في المملكة العربية السعودية بمناسبة عيد الفطر، بعدها حفلة تانية في الكويت، من خلال الحفلات دي أثبتت شيرين قوتها وحبها لجمهورها.
فيفي عبده
بعد وفاة أختها بأسبوع، بدأت تنزل فيديوهات من رقصاتها وإطلالتها على إنستجرام، وظهرت كمان فيها بتتكلم مع جمهورها بطريقتها العفوية والمعتادة، رغم إن عدد كير هاجمها وقتها قالت: "الحزن مش هيرجع اللي مات".
