الفن بيتغير كل فترة من الوقت، وكل زمان وله لونه وجمهوره. يعني اللي اتربي على أغاني أم كلثوم وعبد الحليم، غير اللي طلع على حماقي وتامر حسني. وطبعًا ماننساش اللون الشعبي والمهرجانات.
في بداية الألفينات ظهر عدد من الكليبات لأغاني قلبت الدنيا وقتها. إما بسبب كلمات الأغنية أو فكرة الكليب نفسه. تعالوا نفتكر أشهر أغاني الفيديو الكليب، اللي ولعت الدنيا من غير ما يكون في سوشيال ميديا.
أخاصمك آه - نانسي عجرم
فكرة إننا نشوف بنت لبنانية بتمتع بكل مقومات الجمال والأنوثة، بتتدلع وترقص في بار كله رجالة. كانت صدمة بالنسبة للجيل ده سنين طويلة. بس الكليب كان بداية ظهور نانسي عجرم، وبعدها اتشهرت في العالم كله
انت عارف ليه - روبي
الأغنية عملت طفرة ماتتنسيش، لما روبي لبست بدلة رقص، ورقصت بكل جرأة في الشارع وسط الأجانب. صحيح أغلب كليبات روبي كانت بتقلب الدنيا، لكن الكليب ده كان غير.
يابن الحلال - هيفاء وهبي
طبعًا ماحدش ينسى البنطلون الأحمر الجلد، اللي كانت لابساه هيفاء وهبي. وعجب الشباب كلهم ولاد وبنات. ده كمان بعد انتشار الكليب بقى موضة، والبنات بدأو يقلدوا ستايل هيفاء من كتر جمالها.
الدنيا مجنونة - محمود العسيلي
محمود العسيلي في الكليب ده، كان أكبر دليل على أن الدنيا فعلًا مجنونة. وده من غير مايكون جامد جدًا أو معاه واسطة مثلا. بطريقة غناه المعروفة، وكلمات بسيطة جدًا تقريبا مش ماشية مع بعضها. بس دي من أشهر الأغاني اللي سايبة علامة كبيرة معانا لحد دلوقتي.
احكيلي وفضفضيلي - منة ونهلة
أي بنت لسه مفركشة، أو بتعاني من مشاكل رومانسية، لازم تسمع نصائح منة ونهلة الذهبية. الأغنية كانت فعلًا جميلة ومختلفة. واتصورت بشكل شرقي، جدًا سواء في اللبس أو الأكسسوارات، وحتى المكان كان تاريخي.
ألعب ألعب - ماريا
كليب ماتعرفش تحدد هو للأطفال ولا للكبار. ماريا كانت عاملة دور طفلة بضفيرتين، وده أطفال. أما إنها تقعد في بانيو مليان لبن وتيميز، فده ماكنش أطفال خالص. الكليب ولع الدنيا لدرجة إنها اتشهرت بـ"ماريا ألعب".
