مش دايمًا حياة الفنانين الشخصية، بتكون حلوة وبتلمع زي ما ناس كتير فاكرة، وزي ما شوفنا على مر الزمن، إزاي الاكتئاب أو الحزن العميق؟ قدر يتملك من نجوم ملوا الشاشات بهجة وأمل.
غادة عبد الرازق نجمة محدش يختلف على قوة موهبتها، لكن غادة الإنسانة ممكن ما تكونش بنفس القوة، حسب كلامها مؤخرًا مع لميس الحديدي، في برنامجها "كلمة أخيرة"، كالعادة فتحت قلبها وشالت كل الحواجز لدرجة مرعبة.
"أنا معنديش استقرار نفسي، أنا ست بتعامل مريضة من 35 سنة، مينفعش حد يقولي استقرارك النفسي؛ لأني معنديش لا استقرار نفسي ولا عاطفي ولا أي استقرار". شئ محزن تكون عايش فاقد طعم الاستقرار ومش عارف توصله!
"رغبتي في النجاح والشهرة والماديات، حرمتني من حاجات كتير في حياتي بحسد الناس عليها، زي الاستقرار العاطفي وتكوين أسرة"، اعتراف من غادة أول مرة تقوله!
قالت كمان إنها بتكره شعور الكسرة وبتخاف من شماتة الناس فيها، علشان كده بتبعد عن الأضواء في أوقات ضعفها، فقالت :"أنا عموما ست بيتونية جدًا مختفية طول الوقت، لكن في لحظة الانكسار بختفي أكثر".
ووضحت الحاجات اللي ممكن تكسرها وقالت: "بتكسر من حاجات كثير زي كل البني أدمين، فشل في الشغل يكسرني أعداء ممكن يحاربوني، حاجة تمس بنتي أو أهلي، حاجة تشوه سمعتي، خيانة، أزمة مادية؛ كل حاجة ممكن تكسرني".