ظهور السيناريست تامر حبيب لابس حلق في أحد أذنيه في واحدة من الحفلات الخاصة مؤخرًا، عرضه لهجوم وانتقاد كبير على السوشيال ميديا، وده بجانب علاقته القريبة جدًا من بعض الفنانات اللي بعض الناس بتشوفها غريبة شوية.

وعبر "تامر" عن استغرابه من وجهات النظر دي، خلال لقائه في برنامج "بودكاست بالبجامة" مع الإعلامي شريف نور الدين، وقال: "حتى وأنا واقف في عزاء أمي بمسجد عمر مكرم، قالوا دول بيبوسوا بعض ويجهرون بالمعصية، معصية إيه، لما حد يواسي صديقه ويبوسه أو يحضنه تبقى معصية؟".

وعن الفيديو المنتشر وهو بيرقص بمايوه على مركب، أكد إنه حابب يحس بحريته سواء في تصرفاته أو في أي حاجه بيلبسها، وقال: "السوشيال ميديا بقت لعنة كنت بحضر عيد ميلاد صديقتي على مركب في دبي، يعني طبيعي ألبس المايوه!".

وأضاف "لما بنزل صورة وأنا على البحر بتعرض للانتقادات، هما عايزينا نلبس طرابيش مثلًا ما طبيعي نلبس مايوهات، وأه أنا لابس حلق إيه المشكلة؟ لأني عايز أكون نفسي".