اليومين اللي فاتوا، انتشرت شائعات بتقول  إن حسام حبيب خطب عارضة أزياء أردنية اسمها سارة، خصوصًا بعد ما اتشافوا في كذا مناسبة سوا، وحسب موقع  " ET بالعربي"، حسام حببب نفى كل الكلام ده وهيلجأ للقضاء.

وقال: "الموضوع ما وصلش خالص للخطوبة، الناس سبقت الأحداث وخلّوا الموضوع يتعقّد بدل ما الأمور تمشي في سكة كويسة، يعني اللي حصل ده أنا مش عارف أقولهم إيه بصراحة، الحاجة اللي بيتكلموا عنها أصلًا عمرها ما كانت ربع اللي هما بيقولوه!

وقال كمان: "ومش فاهم الناس عايزين مني إيه بجد، دايمًا بيخربوا عليّا حياتي! وإن كان في حاجة، هما كده بوّظوها، لأن أهل البنت عندهم عاداتهم وتقاليدهم، وناس محترمين جدًا جدًا، زيّ ما زمان كان عندنا عاداتنا وتقاليدنا، وكنا فاهمين يعني إيه بنت، يعني إيه نحافظ عليها، مش عارف إيه اللي حصل للمصريين؟ النخوة راحت فين؟".

"يعني أنا مستغرب الناس بقت بتتكلم في أي حاجة لمجرد الترند والمشاهدات! وبعدين يرجعوا يقولوا: حسام هو اللي بيدوّر على اللقطة! فين اللقطة اللي بدوّر عليها؟ إنتو اللي ماشيين ورايا أهو!"، (حسب كلامه) 

وأضاف: "واللي جاي بقى هيبقى وحش، وهيبقى في قضايا، ولازم كل حاجة يكون ليها حدود، ومش المفروض نتكلم عن أعراض الناس".