في أحدث ظهور إعلامي لها، كشفت حورية فرغلي كواليس من حياتها الفنية والشخصية، خلال استضافتها في برنامج "كشف الأسرار" مع الإعلامية إنجي هشام على شاشة قناة "هي".

وعلقت حورية على الجدل اللي اتكرر بخصوص علاقتها بمحمد رمضان، مؤكدة إن مفيش خلاف شخصي بينها وبينه، وإن كل اللي اتقال عن تجاهله ليها أو رفضه السلام عليها في كواليس مسلسل "الأسطورة" مش دقيق بالشكل اللي اتنقل.

قالت الفنانة حورية فرغلي إنها عمرها ما قالت إنها اشتغلت مع محمد رمضان مجاملة، ووضحت إن الموضوع كان مبادرة منها بدافع الدعم مش أكتر.

وحكت إنه محمد رمضان كلمها وقالها إنه لقى منتج هيقدم له أول فيلم سينما، وإن البطلة اللي كانت مترشحة للدور ما حصلش نصيب، فسألها لو ممكن تيجي مكانها.

حورية قالت إنها وافقت فورًا، وراحت للمنتج أحمد السبكي، ومضت فيلم "عبده موته"، واعتبرت مشاركتها فيه هدية ليه في بداية مشواره، وكملت معاه بعدها في فيلم "قلب الأسد"، وبرضه ماخدتش أجر على الفيلمين.

وبخصوص لقب "نمبر وان"، أكدت حورية إنها مش بتشوفه كده، وقالت إن كل واحد حر يشوف نفسه زي ما هو عايز، لكن من وجهة نظرها كل فنان هو رقم واحد في مجاله.