بعد ساعات قليلة من دلوقتي هنحتفل بعيد الأم، اللي بيوافق 21 من مارس كل سنة، والسنة دي عيد الأم جاي مع عرض عددمن المسلسلات الرمضانية، اللي بتركز على معاناة الأم مع أسرتها في مختلف الطبقات والأزمات كل واحدة بطريقتها.

تعالوا نتعرف عليهم:

دينا الشربيني في كامل العدد

أم حقيقية بشهادة الكل، شايلة ولادها بتفاصيلهم طول الوقت، مش بس كده، مرات أب هايلة، وصديقة جدعة، وبتحاول تكونزوجة مش مقصرة، حاجة كده لو اختفت يوم الحياة تتلغبط.

مي عمر في نعمة الأفوكاتو

شاطرة في شغلها، ذكائها المهني خلالها تحقق نجاحات في وقت قليل، واخدة بالها من والدها ومختلش دوامة الحياة تشغلها عنه، صحيح مرت بصدمات في حياتها الزوجية، لكن من أول يوم في زواجها وهي واقفة في ضهر زوجها لدرجة السذاجة، فيالنهاية نعمة بطلة حياتها.

انتصار في أعلى نسبة مشاهدة

ست شقيانة، بتحاول تساعد زوجها اللي بيعطل عن الحصول على وظيفة في مصاريف البيت، حمدية معايرتش زوجها بقعدته ولا خبت فلوس من وراه، بالعكس، كانت هي السبب في إنقاذ البيت من الضياع أكتر من مرة بسبب تراكم الديون عليهم.

نسرين أمين في بابا جه

أم معيلة، أو ببساطة جوزها شخص مهمل ومستهتر رامي كل طلبات البيت عليها، مش بس المادية لا كمان تربيتهم خالع إيده منها، فا بتقرر في أوقات كتير تقوم بدور الأب اللي وجوده زي عدمه بالظبط.

صابرين وبسمة في مسار إجباري

نموذج لـ 2 ستات كل واحدة فيهم بتكتشف زواج جوزها من التانية، السر ده بيتعرف بعد وفاة زوجهم المشترك، اللي قدري خبي عليهم سنين طويلة، المفارقة هنا إنهم بعد ما عرفوا الحقيقة قرروا يبقوا صحاب ويسامحوا بعض خاصة إن أولادهم أصبحوا أخوات، وده طبعًا موقف بطولي مش أي ست تقدر تعمله.