عشاق الحكاوي والدراما ، استعدوا لمشاهدة 6 مسلسلات بيجهزوا لموسم الأوف سيزون الصيف ده، وكل عمل فيهم داخل بتوليفة مختلفة ما بين الكوميديا والدراما والتشويق، وده في محاولة من صناع الدراما يجذبوا الجمهور بعيد عن موسم رمضان، خصوصًا مع نجاح منصات العرض الأونلاين الفترة الأخيرة
"وتر حساس 2"
بيكمل على قصة الجزء الأول، لكن المرة دي البطلة بتتغير، وبدل صبا مبارك، غادة عادل هتقدم دور "ناهد"، وهي دكتورة نفسية بتدخل في صراع نفسي وقانوني مع شخصيات تانية، وسط ضغط نفسي بيكبر مع الوقت.
بيضم غادة عادل، إنجي المقدم، محمد محمود عبد العزيز، كمال أبو رية، رانيا منصور، نبيل عيسى، إلهام وجدي المسلسل إنتاج المتحدة وبدأ تصويره آخر يوليو، ومقرر عرضه خلال الصيف الحالي.
"ابن النادي"
بيحكي عن شاب بيشتغل في نادي رياضي وبيتعرض لمواقف غريبة وكوميدية جوه الشغل، وبيحاول يثبت نفسه رغم الفروق الاجتماعية اللي بيقابلها كل يوم، في إطار خفيف وبسيط يناسب الأوف سيزون.
بطولة أحمد فهمي، حاتم صلاح، جلا هشام، أحمد عبد الحميد، المسلسل بيتعرض حاليًا على منصة شاهد
"220 يوم"
القصة عن كاتب ناجح فجأة بيكتشف إنه مصاب بمرض خطير، وفي نفس الوقت بيعرف إن مراته حامل، بيبدأ يحسب كل حاجة وراه، لأن اللي فاضله 220 يوم قبل العملية اللي ممكن تنهي حياته أو تغيرها للأبد، وده بيخليه يدخل في دوامة قرارات ومشاعر متضاربة.
بطولة كريم فهمي وصبا مبارك، وبيعرض دلوقت على منصة شاهد
"ما تراه ليس كما يبدو"
المسلسل عبارة عن 7 حكايات منفصلة، كل حكاية 5 حلقات، وفي كل حكاية بنشوف قصة اجتماعية أو نفسية أو تشويقية، زي "بتوقيت 2028"، و"هند"، و"فلاش باك"، و"أنت فقط"، وكل واحدة منهم بتتناول قضية مختلفة بشكل غير تقليدي.
العمل من إنتاج المتحدة، والمخرجين والأبطال بيتغيروا حسب كل حكاية، المسلسل هيتعرض خلال أغسطس على التلفزيون ومنصات المتحدة.
"ولد وبنت وشايب"
قصة اجتماعية خفيفة عن 3 شخصيات من أعمار مختلفة بيعيشوا مع بعض في بيت واحد، وبيتورطوا في مواقف طريفة وإنسانية، وبتظهر بينهم روابط مش متوقعة، رغم فارق السن وطريقة التفكير.
بطولة أشرف عبد الباقي، انتصار، وعدد من الوجوه الشابة، إخراج زينة عبد الباقي في أول تجربة إخراج ليها في الدراما، المسلسل مكون من 10 حلقات، وهيتعرض قريبًا على منصة وانش إت.
"قسمة العدل"
مسلسل اجتماعي بيتكلم عن صراع على الميراث داخل عيلة كبيرة، وكل فرد فيها شايف "العدل" بطريقته، وده بيخلق صدامات بتقلب شكل العلاقات، وبتكشف أسرار مدفونة بقالها سنين.
بطولة إيمان العاصي، ومن تأليف وإنتاج المتحدة، التصوير هيبدأ في أغسطس، والعرض هيكون خلال الأوف سيزون.
