بدأ النصف الثاني من رمضان النهارده، وهيبدأ معاه سباق درامي جديد مع مسلسلات الـ 15 حلقة، بقصص متنوعة بين الأكشن، الغموض، والدراما الاجتماعية وكمان الكوميديا، كلها جاهزة تخطف الأنظار وتنافس بقوة، جمعناهالكم في السطور الجاية...
"فرصة أخيرة"
المسلسل بطولة محمود حميدة وطارق لطفي، قاضي بيلاقي نفسه قدام اختبار صعب لما حياته العائلية تدخل في أزمة كبيرة، وبيحاول يوازن بين مبادئه في العدالة وحماية أسرته.
بيتعرض على قناة DMC ومنصة WATCH IT.
"بيبو"
شاب بسيط بيكتشف إنه ينتمي لعيلة صعيدية كبيرة، وبيحاول يتأقلم مع عالم جديد مختلف تمامًا عن حياته. بطولة كزبرة وسيد رجب.
بيتعرض على قنوات ON وCBC والحياة، ومنصة WATCH IT.
"النص 2"
الأحداث بتكمل حكاية عبدالعزيز النص، اللي بيحاول يعيش حياة هادية مع ابنه بعيد عن مطاردة الإنجليز. بطولة أحمد أمين وأسماء أبو اليزيد.
بيتعرض على قناة ON ومنصة يانجو بلاي.
"عرض وطلب"
فتاة بتدخل في سلسلة أزمات معقدة وهي بتحاول تنقذ والدتها المريضة، وده بيحطها قدام قرارات صعبة بتغير حياتها. بطولة سلمى أبو ضيف وعلي صبحي.
بيتعرض على قناة ON ومنصة WATCH IT.
"حكاية نرجس"
ست بتعاني ضغوط المجتمع بسبب عدم الإنجاب، وبتتورط في سلسلة أكاذيب وأحداث معقدة وهي بتحاول تبني أسرة. بطولة ريهام عبدالغفور وحمزة العيلي.
بيتعرض على قناة الحياة ومنصة WATCH IT.
"أب ولكن"
أب بيحاول يتمسك بحقه في رؤية بنته بعد الطلاق، وبيواجه صراعات قانونية وعائلية بتأثر على حياة الطفلة. بطولة محمد فراج وهاجر أحمد.
بيتعرض على قناة DMC وكمان على منصة WATCH IT.
"اللون الأزرق"
أسرة بتتعامل مع طفل مصاب بالتوحد، وبيسلط الضوء على تأثير الحالة دي على حياة العيلة والمجتمع حواليهم. بطولة جومانا مراد وأحمد رزق.
بيتعرض على قناتي CBC والحياة ومنصة WATCH IT.
"المتر سمير"
محامي شاطر في حل مشاكل وقضايا الخلافات الزوجية، لكنه في نفس الوقت مش قادر يدير حياته الشخصية بعد الطلاق. بطولة كريم محمود عبدالعزيز وناهد السباعي.
بيتعرض على قناة MBC مصر ومنصة شاهد.
"نون النسوة"
مجموعة سيدات بيخلوا عالم السوشيال ميديا وبنشوف علاقاتهم وحياتهم اليومية والتغيرات اللي بتحصلهم بسببها. بطولة مي كساب وأحمد الرافعي.
بيتعرض على قناة MBC مصر ومنصة شاهد.
"بابا وماما جيران"
زوجين منفصلين بيلاقوا نفسهم جيران في عمارة واحدة، وده بيخلق بينهم وبين الجيران مواقف ومفارقات طريفة. بطولة أحمد داود وميرنا جميل.
بيتعرض على قناة MBC مصر ومنصة شاهد.
