بشكل مفاجئ، من ساعات قليلة نشر المخرج محمد سامي بوست طويل على فيسبوك، أعلن خلال اعتزال الدراما التلفزيونية، وإن السنة دي كانت آخر سنة يقدم فيها أعمال تليفزيونية.

واعتذر المخرج الشهير عن أي مشهد قدمه خلال رحلته الإخراجية معجبش الجمهور، لإن "الفنون جنون" زي ما بيقولوا، حسب كلامه.

سامي وضح إن من ضمن أسباب اعتزاله، إنه قدم كل اللي يقدر عليه لإسعاد الجمهور العربي، على مدار 15 سنة، وخايف الجمهور يتشبع من طريقته أو يقع في فخ التكرار ودائرة المتوقع والملل.

وكشف محمد سامي إنه كان واخد قرار الاعتزال التليفزيوني من فترة، لكن كان بينتهي من التزامات مع الشركات والفنانين، وحاليًا خلصت، ومعندوش حاجة يقدمها.

وطلب من جمهوره يدعيله، لإنه هيسافر بره مصر سنتين يتعلم حاجة جديدة بيحبها، كان نفسه يتعلمها من زمان، وأجلها كتير لحد ما لاقى نفسه بيكبر وخايف يفوت العمر قبل ما يعمل اللي نفسه فيه.