انتشر على السوشيال ميديا فيديو ظهر فيه "تُربي" من مقابر البساتين، بيدعي إنه لقى عمل سحري مدفون عليه صورة اللاعب مؤمن زكريا، وهو بيزرع صبار بجوار مقبرة عائلة مجدي عبدالغني لاعب كرة القدم السابق! الأمر اللي سبب جدل قوي جدًا، ولكن، تابعوا السطور الجاية...

الجهات المعنية  حققت في الواقعة، واكتشفت تلفيق وفبركة القصة من أولها لآخرها، باعتراف مرتكبيها، واللي قالوا إنهم لما عرفوا مرض مؤمن زكريا، احضروا صورته وكتبوا عليها طلاسم وعبارات مش مفهومة وكمان عروسة قماش بها مجموعة دبابيس، ودفنوا كل ده في مقبرة عائلة اللاعب مجدي عبد الغنى لإلصاق الواقعة به لكونها عائلة رياضية مشهورة.

ونشر المتهمين الفيديو على مواقع التواصل الاجتماعي علشان يجذبوا أكبر عدد من المشاهدات والمتابعين، ويحققوا من وراه مكاسب مالية!!

أما اللاعب مجدي عبد الغني فقال إنه ميعرفش شئ عن الواقعة دي، وإنه مازارش المقابر أصلًا من وقت وفاة والده سنة 1984، خاصة بعد شرائه مقابر جديدة في مكان تاني، وبناء عليه هيقدم بلاغات للنائب العام ضد أي شخص اتهمه بالكذب والتلفيق.