رجل الأعمال نجيب ساويرس أعلن إنه ناوي يكتب مذكراته في كتاب يوثق فيه مشواره في الحياة والشغل، بكل اللي فيه من نجاحات وتحديات، من غير تجميل أو تجنب لأي تفاصيل.

ساويرس قال إنه بسبب انشغاله الشديد، بيكتب صفحة واحدة بس كل شهر، لكنه مصرّ يوثق كل المراحل اللي مرّ بيها، الحلوة قبل الصعبة.

وخلال كلامه، أوضح إنه مش شايف إن حياته سهلة تتحول لفيلم سينمائي، خصوصًا إن شخصيته فيها تناقضات، ووصف نفسه إنه “نص مجنون ونص عاقل”، وده يصعّب اختيار ممثل يجسده بدقة.

وعلى سبيل الضحك، قال لو الفنان عادل إمام كان أصغر سنًا، كان هيبقى أنسب واحد يقدم شخصيته على الشاشة.

الكلام ده جه على هامش حفل جوائز ساويرس الثقافية في دورتها الـ21، واللي أقيمت في الجامعة الأمريكية بالقاهرة، وكرمت عدد من الكُتاب والمبدعين عن أعمالهم الأدبية المميزة.