طرح الكينج محمد منير والرابر ويجز فيديو كليب أغنية "كلام فرسان"، والحقيقة إنه مش مجرد دويتو، ده لحظات إنسانية نادرة، جيلين المزيكا تجمعهم في مساحة دافئة، وفيديو كليب يبان بسيط في شكله، لكنه مليان تفاصيل بتحرك حاجات جوانا.
ودي دردشة معاكوا عن حاجات عجبتنا:
قعدة منير مع ويجز
الدويتو ده وحي خيالنا واتحقق، وده بيقول حاجات كتير عن منير أهمها إنه مش بس كينج الغناء، لكنه كمان كينج في تواضعه وقلبه المفتوح للجيل الجديد.
الصحبة
بطل الفيديو كليب، شلة الصحاب اللي بيتنططوا من الفرحة مهما كانت بساطتها، وألطف ما فيه إنه ماشين سوا كأنهم واحد، وده يحسسك إن الدنيا لسه بخير لما تلاقي ناس حواليك شبهك.
الجيلين بيحضنوا بعض
صوت منير وويجز سوا، خلق مزيكا خدتنا للتسعينات ورجعتنا تاني لدلوقتي، وده اللي منير حب يوصله لما قال لويجز إنت بتفكرني ببداياتي.
بتلمس كل حد فينا
كلمات الأغنية وكمان مشاهد الكليب فيها شيء من كل واحد فينا، وفي لحظة كده، هتلاقي دماغك جابتك لحدوتة قديمة زعلتك مع اللي كنت فاكرهم صحابك أو موقف وجعك من الدنيا وحوارتها.
أسوان
عروسة النيل، دافاها وخفتها وطبيعتها، عملوا حالة حلوة تدخل القلب بسهولة، تخليك عايز تقوم تخضر شنطتك وتروح على هناك تهدي روحك.
