بعد فترة غياب طويلة استمرت لسنين، أعلن المطرب عن عودته من جديد للأضواء بشكل رسمي، بعد ما وقع تعاقد جديد مع المنتج ريتشارد الحاج، في خطوة هدفها إعادة تقديمه للسوق وطرح أعمال تليق بمشواره.

في تفاصيل الاتفاق، ريتشارد الحاج قال إن التعاون مش أغنية وخلاص، لكنه مشروع كامل لإنتاج أعمال جديدة، وإعادة طرح أغاني فارس القديمة على كل المنصات الرقمية بشكل رسمي وموثق، علشان ترجع للناس اللي بتحبها وتوصل لجمهور جديد ما يعرفهاش.

فارس من ناحيته أكد إن أول أغنية من خطة الرجوع جاهزة للطرح مع بداية السنة الجديدة، وكشف إنها هتكون من كلمات عادل سلامة، ألحان أحمد محيي، وتوزيع سادو، ومتوقع تنزل نهاية ديسمبر أو أول يناير.

وقال كمان إن غيابه لسنين كان لأسباب كتير، لكنه شايف إن الوقت الحالي هو الأنسب للعودة، وإن الجمهور بقى بيدور على الجودة قبل أي حاجة، وده اللي ناوي يقدمه الفترة الجاية.

الرجوع ده بيعيد واحد من أشهر أصوات وبصمات فترة التسعينات والألفينات من تاني ، في لحظة واضحة فيها حنين كبير للجيل ده، ومتحمسين نسمع أول أغنية.