أكيد وأنت على بتسكرول على الإنترنت اتكعبلت في فيديو أو صور لـ لعبة جديدة اسمها لابوبو، واللي منتشرة بشكل غريب ومميز اليومين دول، واتحولت من مجرد لعبة أطفال لموضة منتشرة في العالم كله.

الدمية دي ابتكرها فنان من هونغ كونج اسمه "Kasing Lung"، وكانت ضمن سلسلة اسمها The Monstersسنة 2015، وبعدها تعاون مع شركة صينية كبيرة في مجال الألعاب اسمها Pop Mart، وقدروا مع بعض ينقلوا لابوبو لمستوى تاني خالص!

اللي بيشوف لابوبو الصينية لأول مرة ممكن يستغرب شكلها: سنان بارزة، شعر منكوش، وعيون واسعة جدًا، وبعض الناس حبتها وبدأت تشتريها مش بس كـ لعبة، لكن كقطعة ديكور، أو إكسسوار للشنطة، أو حتى كرمز شخصي على السوشيال ميديا!

الشهرة الحقيقية لـ لابوبو بدأت لما ناس كتير من النجوم والإنفلونسرز بدأوا يصوروها في اليوميات بتاعتهم، شوفناها مع فنانين آسيويين، وصناع محتوى في الموضة والسفر، وده خلى ناس أكتر تدخل التريند وتبدأ تدور عليها.

شركة Pop Mart قدمت نسخ كتير من لابوبو بألوان وتصميمات مختلفة، زي النسخة اللي مستوحاة من حلويات الماكرون، أو نسخ فيها لابوبو لابسة لبس شتوي أو عاملة نفسها شخصية خارقة!وبعض الإصدارات النادرة بقت تتباع بأسعار غالية جدًا، وصلت لمئات الدولارات، وده خلاها تدخل في عالم تجميع التحف والمقتنيات، دلوقتي لابوبو مش بس دمية، بقت رمز للناس اللي بتحب الحاجات الغريبة واللطيفة في نفس الوقت، وبقت جزء من تريند عالمي دخل الموضة، الديكور، وحتى الهدايا.

ملحوظة: فيه ناس بقت تخصص صفحات كاملة على إنستجرام وتيك توك بس للابوبو! بيشاركوا صورها، قصص عنها، وتحديات تصوير بيها.