اوعى تفتكر إن الكتابة على الكيبورد حل سريع ومريح وعادي نعتمده بدل الكتابة اليدوية هيحصل إيه! الحقيقة إن هيحصل كتير لدرجة إن صحتك العقلية ممكن تتأثر، يعني إيه الكلام ده، تابعوا السطور الجاية هتفهموا أكتر…
بيقولك ياسيدي، إن دراسات كتير اتعملت علشان تشرف تأثير الكتابة اليدوية على المخ وهل فعلًا لها فوائد؟ والنتائج كانت مذهلة، الباحثين وجدوا إن إمساك القلم بالأصابع والضغط عليه على سطح الورقة وتحريك إيدك لإنشاء الحروف والكلمات، تمرين مفيد جدًا للعقل وبيساعد على تحسين التركيز والاحتفاظ بالذاكرة.
والدليل على ده إن الأشخاص اللي بيمارسوا الكتابة اليدوية، ذاكرتهم بتكون أقوى في تذكر الأشياء اللي كتبوها يدويًا، مقارنة باللي قاموا بكتابة على جهاز الكمبيوتر، لإن حصل إشراك أكثر من حاسة في نفس الوقت، الأمر اللي بيأثر بشكل حيوي في استيعابنا المعلومات، حسب الدراسة.
مش بس كده، عملوا دراسة تانية على أشخاص بيتعلموا اللغة العربية، من غير الناطقين بها، واكتشفوا إن اللي اتعلموا الحروف عن طريق كتابتها باليد، تعرفوا عليها ونطقوها بشكل أسرع، من اللي درسوها عن طريق الكتابة على لوحة المفاتيح أو بمجرد النظر ليها.
وكمان من ضمن الفوائد اللي الكتابة على الأجهزة مبتقدمهاش، إن الدماغ بتكون في حالة نشاط عند الكتابة باليد أكثر بكتير من وقت الكتابة على الأجهزة اللوحية.
