مرة جديدة بتدخل مروة رخا الكاتبة وخبيرة المونتيسوري، عالم حساس شوية في مجتمعاتنا العربية، من خلال أحدث مشروعاتها كتاب "حديث النحل والطيور"، المتخصص في توعية الأطفال بالتربية الجنسية، طريقة سرد الكتاب مش تقليدية بالمرة، لكنه كتاب تفاعلي باستخدام أحدث التقنيات، علشان يبسط المعلومة ويقدمها في شكل لعبة مُسلية. تعالوا نعرف أكتر عنه.

حدوتة الكتاب بتحكي قصة لطيفة عن ولد وبنت مهتمين بمتابعة الطيور والزهور، بيدور في خيالهم أسئلة كتير عن التكاثر والتزاوج والتخصيب في الكائنات دي، وعلى صفحات الكتاب هتلاقوا كل الإجابات واضحة، بطريقة جذابة ومفهومة للأطفال من سن 6 لـ 12 سنة.

وعلشان تجمع ما بين تنمية المهارات اليدوية والعقلية والتكنولوجيا، هنلاقي إن الكتاب بيعتمد على ألعاب مسلية زي: الكلمات المتقاطعة، البازل، البحث عن الكلمة المفقودة، وكمان متاح بشكل إلكتروني من هنا.

"آدم" ابن مروة ساعدها في تصميم كتابها الجديد، من أول اختيار الألوان لحد تصميم الصور باستخدام تقنيات الذكاء الاصطناعي، وقالت عنه: " لولا أدم مكانش (حديث النحل والطيور) ظهر للنور".

الكاتبة الخارجة عن المألوف، كانت بتتمنى تنشر كتابها مجانًا، لكن خلال الرحلة اضطرت تشتري أدوات احترافية، بالتعاون تطبيق "كتبي" المتخصص في تحويل الكتب لعناصر تفاعلية، وأصبح الكتاب بسعر 5 دولار يعني حوالي 154 جنيه، مع طرق مختلفة للدفع تناسب الجميع.

"حديث النحل والطيور" كتاب بيبحث عنه الأهل اللي عايزين يعلموا أبنائهم المعلومات الجنسية بطريقة سليمة، ومش عارفين أو مكسوفين أو مترددين، يعلموا إيه؟