الدراسة بدأت وفيه مننا اللي داخل على أهم حدث في حياته.. الجامعة. وده حدث استثنائي وحلم كده بالنسبة لطلبة كتير، خصوصًا البنات المستجدين اللي جايين من الثانوية العامة طازة. وعندهم شوية أفكار مش حقيقية عن حياة الجامعة، علشان كده قررنا نساعدهم، قبل ما يتحفل عليهم ويبقى شكلهم "مش طبيعي"، زي خلف الدهشوي في فيلم "صعيدي في الجامعة الأمريكية".
وإليكم أهم النصائح:
- اللبس وكمان مرة اللبس. مش معنى إنك مش هتلبسي يونيفورم المدرسة تاني، إنه عادي تروحي الجامعة بـ دريس "بربرق" مثلًا. خليكي في المعقول، الجامعة مش عيد ميلاد كبير.
- نيجي للميكب بقى، طبقات الفاونديشن والهايلايتر، مش مكانها مدرج الجامعة، بالعكس، البساطة دايمًا أشيك، وعلشان نسهلها عليكي، تقدري تشوفي من هنا، فيديو للبلوجر سارة هاني عن ميكب الجامعة.
- خليكي على طبيعتك وعاملي الناس كلها زي بعض، بلاش تكوني "fake" عشان الناس تحبك. الفشخرة مش حلوة.
- لو كنتِ جاية من الأقاليم أو من محافظة بعيدة عن القاهرة، حاولي تتأقلمي مع الوضع وبلاش تعلقي على كل حاجة هتشوفيها. لإنك من الآخر هتشوفي كتير. مهم كمان تفكري كويس قبل ما تجربي أي حاجة جديدة عليكي.
وأخيرًا.. انسي كلام المدرسة وركزي بقى في كلام الجامعة. دلوقتي بتتعاملي مع مصطلحات زي: دكتور والأسيستنت، محاضرة أو سكشن، مدرج. خلاص مافيش فصل ولا أستاذ ولا واجب.
على طبيعتكم هستمتعوا بأيامكم الحلوة!
