فكرة إنك تلاقي فرصة عمل على صفحات الجرائد، أو تطبع سيرتك الذاتية أو "C V” الخاص بيك، وتلف بيه على المكاتب والشركات أو أيا كان مجال عملك، مبقتش مناسبة دلوقتي، وجه مكانها مواقع توظيف الإنترنت بشكل ملحوظ، وزي ما أوقات إعلانات الوظائف بتكون حقيقية أوقات كمان بتكون عصابات لسرقة بيانات العميل وحساباته البنكية.

علشان كده هنقولك على 5 حاجات تاخد بالك منها وأنت بتقدم على وظيفة من خلال الإنترنت أو تطبيقات التواصل الاجتماعي:

1- لو كان الإعلان مثالي، يعني بيضمن مرتب كبير في وقت سريع لدرجة مبالغ فيها، فا غالبًا بيكون خدعة من الجهة المسؤلة عن الإعلان، علشان تسلمهم بياناتك الخاصة.

2- أي شركة لازم تعمل مقابلة سواء شخصية أو بالتليفون، ولو ده محصلش وبلغوك إنك أصبحت من فريق العمل بدون مقابلة، هنا لازم تفكر تاني.

3- في الغالب الشخص اللي بيتواصل معاك بخصوص الوظيفة الجديدة، طريقته بتكون جادة، فلو لاحظت عكس كده، والمتصل بيك ودود لدرجة كبيرة، خد حذرك.

4- أوقات بيوهمك صاحب الإعلان إنه مش هيقدر يقدملك أي تفاصيل عن الوظيفة الجديدة علشان السرية، ودي علامة كبيرة على إنك قدام عرض عمل وهمي.

5- لو تم الضغط عليك بضرورة الموافقة على الوظيفة، خلال ساعات معينة، مع إرسال بياناتك الخاصة ومستنداتك بسرعة، خد خطوة لوراء وفكر بالمنطق هتلاقي الموضوع مريب.