ناس كتير اتعودت تشيل الأدوية، سواء كانت كبسولات أو شرب في أماكن مختلفة جوه البيت، زي: الثلاجة أو الأدراج أو حتى في دولاب الحمام، لكن ياترى إيه هو المكان المناسب فعلًا لحفظ الأدوية؟

محتاجين نعرف في البداية إن الحرارة وضوء الشمس والرطوبة ممكن تسبب تلف الدواء، وبالتالي المفروض نخزنه في مكان بارد وجاف، على سبيل المثال: دولاب الملابس أو دولاب المطبخ بشرط يكون بعيد عن البوتجاز والحوض وأي أجهزة ساخنة.

أما بالنسبة لو كنت متعود تحفظ الأدوية في دولاب الحمام، فا بننصحك تغير مكانها، لأن الحرارة والرطوبة الناتجة من الاستحمام والحوض تسبب تلف الدواء، وممكن الأدوية تصبح أقل فعالية وتفسد قبل تاريخ انتهاء صلاحيتها، خاصة الكبسولات ممكن تتحلل، وده يسبب تهيج المعدة.

وعن التخزين في الثلاجة، يفضل في حالة كانت نشرة الدواء مكتوب عليها عبارة "يحفظ في الثلاجة"، وده بيكون مع الدواء المعلق، زي المضادات الحيوية.

من المهم كمان تحتفظ بالشريط في عبوته الأصلية دائمًا، مع ضرورة قراءة طريقة تخزين الدواء الموجودة في النشرة.