ناس كتير بيزعلوا على حالهم علشان لا مرتبطين، ولا بيشاركوا حد تفاصيل حياتهم. صحيح الحب حلو لو كان مع الشخص المناسب، بس برضو السنجلة زي ما بيقولو كده "جنتلة". وأوقات كتير الشخص السنجل حياته بتكون مليانة سعادة وانبساط، أكتر من اللي عايش قصة حب، مع حد خانقه وبيقل راحته.

وبما إن النهارده 11 نوفمبر يوم الاحتفال بالسناجل واللي بدأ في الصين وانتشر في دول كتير بعد كده، حابين نقول لكم على امتيازات الشخص السنجل. علشان مايبقاش حد أحسن من حد:

1- مرتاح ورايق

مبدأيًا كده لازم نكون عارفين إن السنجل حد باله رايق ومزاجه مظبوط أغلب الوقت. ما هو ماحدش بيسأله رايح فين وجي منين، أو يقول له كلم فلان وماتكلمش علان. ممشي الدنيا بمزاجه ويفعل ما يحلو له.

2- عايش بكيفه

يسافر وقت ما يحب، يلبس اللي عاجبه وهكذا. ودي ميزة بتحسها البنات أكتر من الشباب. واللي نسبة مش قليلة منهم بيفركشوا، بسبب تحكم خطيبها أو صاحبها في ستايل لبسها، أو اللي بيمنعها من السفر علشان بيغير عليها.

3- ناجح بزيادة

دراسات كتير أثبتت أن الارتباط أوقات بيكون عائق في الحياة، خصوصًا لو حد مرتبط بشخص متسلط أو غيور. دايمًا بيشده لورا، وبيمنعه يتقدم خطوة لقدام. عكس السنجل اللي كل همه يبني الكارير بتاعه من غير تشتيت.

4- فلوسه بتزيد

كل المرتبطين عارفين قد إيه الارتباط مكلف، هدايا داخلة وهدايا خارجة. ده غير الخروجات والفُسَح. أما صاحبنا السنجل مكفي نفسه وعايش بالقرشين اللي معاه. وكمان قابلين للزيادة، ماهو مفيش حد مسؤول منه ولازم يصرف عليه.

5- موبياله دايمًا بخيره

رصيد هتلاقي، بطارية مشحونة موجود. يقفله براحته ويفتحه لما يجيله مزاج. وبيعوض المورنينج تيكست برسايل الشركة الألمانية لإبادة الحشرات، عمرها ما بتنساه ومغرقاه مسدجات. ومش مستنية اهتمام كمان.

6- أحلى وأرفع

أيوة زي ما قريت كده، الأبحاث بتقول إن العزاب نسبة تعرضهم للسمنة أقل من المرتبطين. لإن اهتمامهم بمظهرهم الخارجي بيكون أكتر، وبيروحوا الجيم أكتر. ما هي الفورمة أهم حاجه في حياته اليومين دول.