فكرة إنك تختار مايوه شيك، مابقتش تقل أهمية عن اختيار لبسنا العادي، والأهم نعرف إن لبس المايوه له وقت معين على جسمنا، يعني مينفعش نقعد بيه اليوم كله على البحر أو "البسين" خاصة وهو مبلول، علشان منعرضش نفسنا لمخاطر صحية، زي:

الحكة 

الجلوس بملابس ضيقة "مايوه" فترة طويلة، بيحبس الرطوبة وبيمنع الجلد من التنفس بشكل سليم، وبالتالي طبقة الجلد بتتعرض للجفاف والتقشير والإحمرار، غالبًا بيصاحبها طفح جلدي على شكل دوائر، وفي الحالة دي نغسل المنطقة المصابة وننشفها كويس، مع غسل الملابس بمياه دافية.

 العدوى الفطرية

بتصيب الستات والبنات بشكل أكبر، وتتكون لما يحصل عدم توازن للخميرة الطبيعية في الجسم والبكتيريا، بتصاحبها أعراض منها، الحكة والتهيج والإفرازات غير الطبيعية، وممكن تسبب العدوى الشديدة تورم وحرقان أثناء التبول، علشان كده ضروري خلع المايوه بعد الانتهاء من السباحة، وطبعًا مننساش ناخد دش بالمياه العادية.

التهابات بكتيرية

 احتكاك الجسم بملابس مبللة فترات طويلة، بيسبب تهيج الجلد وتلف بصيلات الشعر، وبيخليه معرض للعدوى البكتيرية بشكل سريع، وهنا الموضوع بيكون صعب شوية، لإن علاج الالتهابات الفطرية بيكون باستخدام الكريمات المهدئة، لكن الالتهابات البكتيرية بتتطلب زيارة طبيب الجلدية، وأعراضها بتكون أصعب زي الإحساس بألم موضعي واحمرار وتورم.