"من يوم ما مسكت موبايل وهو على طول صامت"، أكيد سمعت الجملة دي قبل كده، وارد جدًا تكون مستغربها، ومش بعيد يكون أنت اللي بنتكلم عنه، أصل الموضوع مش مجرد فكرة ده أسلوب حياة ناس كتير بتتبعه، ولكل واحد وجهة نظر مريحاه.

وطبعًا ده مينفيش فكرة إننا ممكن نتعرض لمواقف مش لطيفة بسبب تشغيل وضع الصامت دايمًا، لكن في نفس الوقت دراسات حديثة قالت صفات مش هتتخيلها عن الأشخاص اللي بيحبوا يقفلوا صوت موبايلاتهم يالا نعرفها حسب موقع "Personal Branding":

-بيحسوا بسلام داخلي، لأنهم مابيشلوش هم التواصل الدائم وبيتجنبوا التوتر الناتج عن متابعة الإشعارات المتكررة.

-بيقدروا وقتهم مع نفسهم، بيستمتعوا بالهدوء، وبيفكروا بعمق، مش سطحيين، بالعكس، عندهم قدرة على التأمل والتفاعل بشكل أعمق مع مشاعرهم.

- قدرتهم على التركيز بتكون أكتر من غيرهم، وعلاقتهم الاجتماعية عميقة وصادقة، كمان عندهم احترام لذاتهم مش محتاجين يتواصلوا دايمًا مع الناس عشان يحسوا بقيمتهم، عزلتهم دي صحية، مش مرضية، لأنها بتديهم مساحة للتفكير والتأمل بعيد عن ضغوط التواصل الدائم.

باختصار، هم أكتر استقرار نفسي وعقلي، وأقل عرضة للقلق والاضطرابات النفسية، وبيحترموا الحدود الشخصية للناس اللي حواليهم، اللي بيعموا كده بيكونوا أكثر صحة نفسية، بفضل قدرتهم على التحكم في مشاعرهم وعدم الانجراف وراء الضغوط الاجتماعية.