تعرف إن بروفة محلات الملابس ليها إتيكيت معين؟ طيب سمعت قبل كده عن إتيكيت نشر الغسيل؟! ببساطة كده يا جماعة الإتيكيت مش مجرد أكل بالشوكة والسكينة وبس، الموضوع أبعد وأكبر من كده بكتير، لكنه مطلوب وبيخليك شخص راقي وشيك في عيون نفسك واللي حواليك.
علشان كده في "كلام القاهرة" هنقولكم على 3 شخصيات هتتعلموا منهم فنون مختلفة من الإتيكيت، يالا نتعرف عليهم:
أمينة شلباية
صحيح بداياتها كانت في مجال التجميل والموضة، وفي فترة من الفترات كانت المرجع الأساسي لبنات وستات كتير، ومع ظهور السوشيال ميديا وانتشار المعلومات في كل مكان، اختفت شوية، لكن مؤخرًا، رجعت أمينة شلباية تاني تتصدر المشهد، والمرة دي بتعلمنا فن الإتيكيت من خلال فيديوهات بتنشرها على حساباتها بمواقع التواصل الاجتماعي، ومعاها هتعرف اتيكيت أكل اللبان وطبعًا البطاطس المقلية.
تقدروا تتابعوها من هنا
إيمان العفيفي
بداية من رفض العريس، للطريقة المناسبة لركوب الأسانسير، للمشية المثالية ومواقف أكتر، بتقدمها خبيرة الإتيكيت إيمان العفيفي بأسلوبها الهادي الموزون، وبعد ما تتفرج على محتواها مش بعيد تحس إن كان فايتك كتير، وضروري فعلًا تفعل الجرس لفيديوهاتها.
تقدروا تتابعوها من هنا
ريهام الهواري
بترد على أسئلة كتير بتدور في دماغنا، زي المفروض نلبس إيه؟ ونتكلم نقول إيه؟ في أول مقابلة مع شخص بنحبه، هنا هتلاقي نفسك بتعرف البعد النفسي أكتر للمواقف، واللي بيسهل عليك التعامل مع الآخرين، يعني هتلاقي دماغك اتكيفت كده وعرفت هتعمل إيه في اللي جاي.
تقدروا تتابعوها من هنا
نهاركم سعيد.
