الموبايل.. أنتيمك الأول والأقرب على مدار اليوم، من أول ما تصحى لحد ما تنام. دايمًا ماسكه بتشوف فيسبوكك، بتتابع إنستجرامك، بتخلص شغلك ممكن. وأحيانًا كده تعمل منه مكالمة أو اتنين. بس على قد ما الموبايل مفيد في حاجات كتيرة، لكن برضو طريقة استخدامنا له فيها أضرار كبيرة. تعالوا نتعرف على أبرز الأخطاء في استخدام الموبايل:

1- بتنام وهو جنبك

بشكل أساسي الموبايلات عبارة عن أجهزة كهرومغناطيسية، يعني بنتبعث منها موجات راديو. الدراسات، رغم عدم التأكيد بشكل قاطع، بتقول إنها بتأثر على المخ. بسبب التعرض لها لساعات طويلة. وبتأثر على دورة النوم الطبيعية، وتخليك تصحى من النوم بشكل متكرر. فلو صعب تبعد الموبايل أو تقفله وانت نايم، يُفضل تخليه على وضع الطيران.

2- النظر للشاشة وقت طويل

الضوء اللي بيخرح من المويبل بيمنع إفراز هرمون الميلاتونين، الهرمون المسؤل عن تنظيم دورة نومك. وده سبب إضافي يخليك ماتنامش جنب الموبايل. كمان الضوء الأزرق الخارج من الشاشة، بيسبب صداع ومشاكل في الرؤية. علشان كده يُفضل تظبط مستويات الإضاءة على تليفونك خصوصًا بالليل.

3- بتستخدمه والشبكة ضعيفة

لما تكون الشبكة في موبايلك ضعيفة، ده معناه إنه بيطلع إشارة قوية كمرسل. وكل ما زادت الطاقة اللي خارجة من الموبايل، كل ما زاد الخطر على صحتك. كمان حرارة الموبايل بتزيد، وده معناه ضرر تاني.

4- بيلمس الجسم بشكل مباشر

دراسات كتير ركزت على العلاقة بين الموبايل والإصابة بالسرطان. تحديدًا بسبب إشارات الإرسال بتاعته اللي بتكون في حدود 900 ميجاهرتز، وبتخلي الموبايل يسخن. في كل مرة بتلمس الموبايل بشكل مباشر، الجسم بيمتص الحرارة بسهولة في أجزاء صغيرة. وطبعًا العكس بيحصل كل ما بعد الموبايل عن الجسم. علشان كده حاول على قد ما تقدر تستخدم السماعات في أي مكالمة، وتخلي في دايمًا مسافة بينك وبين الموبايل.

معروف عن الموبايلات إنها بتسبب إصابات خاصة بالإبهام، وده طبعًا بسبب الكتابة الكتيرة في الشات. لكنها بتسبب كمان إصابات خاصة بالرقبة، وده لإننا بنميل راسنا وإحنا باصين في الموبايل. الوضع ده مع الوقت بيسبب آلام الرقبة والعمود الفقري، وبيأثر على شكل الجسم وانت واقف. دايمًا خلي الموبايل في مستوى العين وانت بتستخدمه، علشان تحمي نفسك من أي إصابات.