لكل اللي مش عارفين يستوعبوا إن بعد العيد جه، قلوبنا معاكوا حاسين بيكم، وعارفين أد إيه بتعانوا علشان ترجعوا لحياتكم العادية، وتخرجوا برة "الكومفورت زون" وفي قول آخر "الأنتخة"، علشان كده في "كلام القاهرة"، هندردش معاكم خطوات بسيطة هتخليكم ترجعوا لحياتكم العادية من غير توتر وضغط.

1- خدها ببساطة

هنا يحضرنا مقولة كابتن مدحت شلبي: "واحدة واحدة بتجري ليه واحدة واحدة ورانا إيه"، على الهادي مهد نفسك إنك رجعت تمارس يومياتك العادية، وبالمناسبة الموضوع ممكن يكون تقيل لكن هتتعود.

2- امتن لشغلك

ضروري تكون مدرك إن مفيش راحة مطلقة، مهما كانت التحديات اللي بتواجهها في شغلك، أكيد بتقضي فيه وقت لطيف، بيحسسك بقيمتك ودورك، وياسلام لو شغلك هو شغفك أو الحاجة اللي بتحبها.

3- رتب نفسك واعمل ليست

أرجع بقى يامعلم، طلع النوت من درج مكتبك، واكتب أول بأول مواعيدك أو أي حاجة مهمة، هتفرق معاك كتير كل ما تنجز حاجة، وهتنفعك أكتر لو كنت بتنسى. 

4- روق مزاجك

كوباية النسكافية، وقت البريك، بلاي ليست الأغاني اللي بتزق معاك اليوم، كل دول وأكتر، حاول تستمتع بيهم، وطبعًا متخليش دوامة الشغل، تاخدك من حياة الشخصية وانبساطك، كله ليه وقته.

5- تخيل حياتك بدون شغل

لو عدت عليك أوقات من غير شغل، فأنت أكيد هتحس كلامنا، الحياة الفاضية والفراغ مش أحسن حاجة للصحة النفسية، وياسيدي لو المرتب مش مكفي حتى مواصلاتك، اتعلم مهارة  تزود دخلك، ابدأ وجرب.