كتير مننا بيحاول يعوض عطش الصيام، بشرب كميات كبيرة من المياه سواء بعد الفطار مباشرة أو خلال السحور، معتقدين إن كل ما شربنا مياه كتير كل ما إحساسنا بالعطش هيقل وإحنا صايمين، لكن العادة دي للأسف مش مفيدة ومش صحية كمان.
علشان ببساطة، الجسم مايقدرش يخزن كميات كبيرة من المياه في حالة تناولها دفعة واحدة في وقت قصير، وبالتالي بياخد حاجته بس وبيتخلص من باقي المياه اللي حصل عليها.
بجانب ده، خبراء التغذية أكدوا إن الجسم علشان يستفيد من المياه خلال شهر رمضان، لازم نقسم كميات المياه اللي بنشربها في الفترة اللي بين الفطار والسحور، وحددوا كمان كميات المياه اللي المفروض نشربها على حسب العمر والجنس، يعني إيه الكلام ده؟ هتعرفوا في السطور الجاية.
- الرجال المفروض يشربوا 13 كوب مياه يوميًا، ما يعادل 3 لتر.
- الستات المفروض يشربوا 9 كوب مياه يوميًا، يعادل لترين أو لترين ونصف، وبتزيد الكمية لـ 11 أو 12 كوب في حالة الحمل والرضاعة.
- الأطفال والمراهقين المفروض يشربوا من 6 لـ 8 أكواب يوميًا.
