بما أن عيد الأضحى قرب، كتير من الناس طبعًا بيدبح خروف أو عجل، أوبيشارك بجزء، كله حسب قدرته المادية، وبتبقى فرحة كبيرة، إلا أن كتير منهم بيستغل الحدث وفرحته وبيدبح في الشارع.
حابين نفكركم إن ده مخالف للقانون وغرامته المالية بتوصل لـ10000 جنيه وبتضاعف في حالة التكرار، أو بيتم إحالة الفاعل للمحاكمة وعقوبته ممكن تؤدي للسجن حسب الواقعة.
القاهرة الكبرى أعلنت رسميًا تطبيق الغرامة على اللي يتم ضبطه، لإنه بيسبب تلوث البيئة والإضرار بالمظهر الحضاري والجمالي، والتعدي على الممتلكات العامة، اللي هي الشاع.
نوهت مدير عام الادارة العامة للمجازر والصحة العامة، لإن الذبح هيكون متوفر طول أيام العيد داخل المجازر المرخصة مجاناً للجمهور، بجانب تواجد غرفة عمليات في كل حي لتلقي بلاغات المواطنين بوجود أي مشكلات لحلها على الفور على الأرقام الخاصة بمديرية الطب البيطري ٢٧٤٢٦٩٩٣، ٢٧٤٢٧٠٥٣، بالإضافة إلى رقم الهيئة العامة للخدمات البيطرية ١٩٥٦١ .
الناس بتدبح في الشارع بعد صلاة العيد مباشرة، باعتباره سنة محببة، لكن دار الإفتاء المصرية أنكرت الكلام ده، وقالت أن إلقاء مخلفات الأضاحي في الطرق أمر مكروه، علشان فيها إيذاء كبير للناس.
