لو لسه ماجربتش تريند "كيس الشيبسي"، وبتفكر تجرب ننصحك تقرأ المقال ده للآخر وتقرر بنفسك، وللي مايعرفش إحنا نتكلم عن إيه، فـ الموضوع ببساطة إنه انتشر على السوشيال ميديا تريند جديد خاص بالأكل، عبارة عن إنك بتجيب كيس شيبسي وتفتحه بالعرض وتحط عليه الوجبة بتاعتك سخنة وتاكل منه.

مطاعم كتير استغلت التريند وشجعت العملاء إنهم يجيبوا كيس شيبسي وهما جايين، والمطعم هيضيف عليه الوجبة اللي هما عايزينها، بدون الاهتمام بأبعاد التريند وأضراره، علشان كده قررنا نعرض عليكم خلاصة أبحاث خبراء التغذية عن التريند، واللي كانت كالتالي: 

1- أكياس الشيبسي معمولة من بلاستيك ومواد مطلية بمركبات كيماوية، لما نحط فيها أكل سخن، المواد دي ممكن تتحلل وتدخل في الأكل، وده خطر على الصحة جدًا لأنه ممكن يسبب تسمم غذائي أو مشاكل في المعدة.

وأكد الدكتور محمد علي، أستاذ الكيمياء الحيوية، إن البلاستيك ممكن يفرز مواد سامة لما يتعرض لحرارة الأكل السخنة، ودي بتأثر على الكبد والكلى.

2- لما الكيماويات تتبخر بسبب الحرارة، ممكن نستنشقها، وده يؤدي لتهيّج في الجهاز التنفسي وحساسية. 

3-كيس الشيبسي أصلاً مليان ملح وزيوت، لما نحط فيه أكل سخن ونستعمله كطبق، بنزوّد فرصة دخول الدهون المشبعة والمواد الضارة لجسمنا.

4- التريند ده بيزود استهلاك أكياس البلاستيك اللي صعب تتحلل، وده بيساهم في التلوث البيئي بشكل كبير. 

‎وفي النهاية حابين نقول إننا لو استخدمنا أطباق وأدوات مصنوعة من مواد طبيعية زي السيراميك أو الزجاج، كده هنكون بنوفر أفضل طريقة أكل أكل آمنة لنفسنا.