عدم اكتشاف العلاج المضاد، خلى فيروس كورونا أهم مسببات القلق في الوقت الحالي. علشان كده بيتم مواجهته بالتزام بالحجر الصحي، والاهتمام بتقوية جهاز المناعة. ودعم المناعة بيكون بأكتر من طريقة، من ضمنها الأكل السليم. إحنا هنقول لكم على 5 فواكه بترفع كفاءة المناعة، حسب ما نشر "الكونسلتو"، علشان تقدروا تواجهوا كورونا:

1- البرتقال

لازم يكون رقم واحد في تعزيز جهاز المناعة، لاحتوائه على نسبة عالية من فيتامين سي. كمان بيحفز إنتاج كرات الدم البيضاء، اللي بتزود كفاءة الجسم لمقاومة الفيروسات. وبيحتوي على كمية كبيرة من المياه والأملاح، المفيدة لنزلات البرد والأنفلونزا وارتفاع درجات الحرارة. لإنه بيعوض المياه والمعادن اللي بيفقدها الجسم في التعرق.

2- الجوافة

فيها مميزات البرتقال من فيتامين سي. كمان بتحتوي على نسبة عالية من الألياف، اللي بتحسن حركة الأمعاء وتسهل عملية الهضم. وبتقلل فرص الإصابة باضطرابات الجهاز الهضمي، زي الإمساك، الانتفاخ، والغازات.

3- الكيوي

غني بفيتامين سي ومضادات الأكسدة اللي بتساهم في تقوية جهاز المناعة، ومكافحة الشوارد الحرة في الجسم. وده بيقلل من فرص الإصابة ببعض الأمراض زي السرطان.

4- الفراولة

فوايدها متقلش أهمية عن الفواكه السابقة. وغنية بفيتامين "هـ" اللي بيعتبر من مضادات الأكسدة المكافحة للشوارد الحرة. وده بيخفض نسبة الكوليسترول الضار في الدم، واللي بدوره بيقلل فرص الإصابة بأمراض القلب والأوعية الدموية.

5- اليوسفي

ابن عم البرتقال بمحتواه العالي من فيتامين سي. بيقلل من أعراض الإصابة بنزلات البرد والإنفلونزا، زي الكحة والرشح والاحتقان. كمان بيخفض نسبة الكوليسترول الضار بالجسم، وده بيقلل من فرص الإصابة بأمراض القلب واضطرابات ضغط الدم. ده غير دوره في تحسين قدرة الجسم على امتصاص الحديد والبروتين النباتي الموجود في باقي الأطعمة.