وصفات وطرق كتيرة بنحضر بيها لحمة العيد، أشهرهم الشوي على الفحم. اللي بيفرق كتير في الطعم وبيخلي المذاق ألذ، ده غير متعة التحضير والشوي في حد ذاتها. لكن الطريقة المعروفة اللي بنشوي بيها، لها أضرار كتيرة على صحتنا. وعلشان نتجنبها ضروري نطبق بعض النصائح، اللي نشرها مؤخرًا موقع "الكونسلتو". تعالوا نعرفها مع بعض.

1- مانحطش اللحمة مباشرة على الفحم. نخلي الفحم في جانب الشواية، واللحمة على الجانب التاني. علشان نقلل أضرار الدخان المتصاعد.

2- نستخدم شواية متعددة الطبقات، ونحط فيها الخضروات من تحت. هتضيف لطعم اللحمة، ومش بتتفاعل مع الفحم فتعتبر عازل. ومش هينتج عنها مواد ضارة.

3- لو تقدر خلي الشواية في وضع مائل مش أفقي. بحيث تتجنب تقطير الدهون مباشرة على الفحم، وتنزل في جانب الشواية.

4- بلاش تاكل الأجزاء المحروقة من اللحم المشوي. لإنها بتكون فقدت عناصرها الغذائية، وبتحتوي على المواد الناتجة عن التلامس مع الفحم، وبتسبب أمراض.

5- رغم الأضرار البيئية، لكن الشوي في الهواء الطلق بيقلل فرص الإصابة بالمشاكل الصحية. مقارنة بالشوي جوة البيت أو مكان مقفول، خاصة لمرضى القلب والحساسية.