هيئة الأرصاد الجوية أعلنت عن بداية فصل الشتاء رسميًا يوم 21 ديسمبر، معناه إننا هنبدأ نحس بانخفاض في درجات الحرارة، والأجواء الشتوية هتاخدنا بالحضن، بس لو مفيش حضن، هنقولك على 5 أطعمة تظبط مودك، لو كنت من الأشخاص اللي بيعانوا من تقلبات مزاجية في الشتاء، حسب ما نشر موقع "الكونسلتو":

1- الشوكولاتة الداكنة

غنية بمضادات الأكسدة اللي بتعزز هرمون الأندروفين والسيروتونين، المسئولين عن المزاج الجيد، اختار الأنواع اللي تركيز الكاكاو فيها أعلى من 70%. 

2- الموز

بيحتوي على فيتامين "ب 6"، اللي بيساعد تحسين الحالة المزاجية والإحساس بالسعادة، كمان فيه نسبة متوزانة من السكر، بتساعد على الاستقرار النفسي، علشان كده تناول ثمرة موز أو اثنين يوميًا هيظبط مودك.

3- المكرونة 

 المصنوعة من الحبوب الكاملة هتكون اختيار مثالي ليه؟ لاحتوائها على نسب عالية من الألياف، اللي بتحافظ على طاقة الجسم، من خلال ضبط سكر الدم، الأمر اللي بيحسن الحالة النفسية.

4- الفول 

مفاجأة مش كده.. الأبحاث أثبتت إن تناول الفول بيحفز المخ على إنتاج هرمون السيروتونين، المسؤل عن الشعور بالسعادة، بيعزيز كمان نمو البكتيريا الجيدة في الأمعاء، بفضل احتوائه على نسب جيدة من الألياف، بالتالي هتسيطر على إحساس الجوع اللي بيلازمنا طول الشتاء ويعكر مزاجنا وإحنا مش واخدين بالنا.

5- السلمون

أكدت الدراسات الطبية إن الأسماك زي السلمون والتونة، وغيرهم. اللي بتحتوي على نسبة عالية من أحماض أوميجا 3 وفيتامين د، بتحسن الحالة المزاجية وبتزود الشعور بالسعادة، وبعض الدراسات وضحت أن الأشخاص اللي أجسامهم بتحتوي على نسب قليلة من الأوميجا 3، معرضين للاكتئاب بشكل أكبر.