أسباب كتير بتأثر على تركيزنا واسترجاعنا للمعلومات على مدار اليوم، منها أسلوب الحياة غير الصحي، الأمر اللي بيدخلنا في مواقف محرجة، وبالتالي بيكون تقوية الذاكرة وزيادة التركيز أهم حاجة بنحاول الوصول ليها، ولإن الأكل مصدر مهم وقوي لجسم وعقل سليم، جمعنالكم 5 أطعمة بتعلي التركيز، هي:

1-الأسماك

أنواع كتير من الأسماك بتحتوي على نسب عالية من الأوميجا 3، واللي بدوره بيحسن أداء الدماغ وبيقوي التركيز، علشان كده بينصح خبراء التغذية بتناول الأسماك من مرتين لـ 3 مرات في الأسبوع، خاصة الدهنية منها، زي السلمون والسردين.

2-الموز

يعتبر الموز مصدر قوي للطاقة، بسبب الفيتامينات والعناصر الغذائية المهمة الموجودة فيه، مش بس كده، بيحتوي على نسب عالية من البوتاسيوم المهم لصحة الدماغ وتحسين مستوى تركيزك.

3-الشوكولاتة

أكدت دراسة من جامعة نيويورك، إن تناول الشوكولاتة بيحسن الوظائف المعرفية في المخ، لاحتوائها على مضادات أكسدة، بالذات النوع "الدارك" الخالي من الألبان وبيحتوي على نسب سكر أقل.

4-المكسرات

بتساعد المكسرات زي عين الجمل واللوز على تقوية التركيز والذاكرة، لإنها مليانة مليانة فيتامينات ومعادن مهمة لصحة الدماغ، واللي بتساهم كمان في تقليل خطر الإصابة بمرض الزهايمر، حاول تدخل المكسرات في وجباتك، أو تاكل منها بمقدار مناسب كل يوم.

5-السبانخ

الأكلة اللي اتسببت في مشاكل كتير في البيوت المصرية، لإن طعمها بيكون مش أفضل حاجة لبعض الناس، لكن فوائدها عظيمة خاصة في تحسين الطاقة العقلية وقوة التركيز. يعني متزعلش من ست الكل تاني لما تعرف إن الغداء سبانخ.