لو بتعاني من الأرق وبتاخد وقت طويل علشان تروح في النوم، فأنت لازم تراجع نظام أكلك، وده حسب كلام خبراء، اللي أكدوا على إن مش بس اللغبطة في مواعيد النوم أو التفكير الكتير، اللي بيأثروا على جودة نومنا، لكن بعض الأطعمة كمان لو أكلناها بالليل!
تعالوا نعرفها سوا:
الشوكولاتة
ناس كتير هتزعل، بس الأكيد إن الشوكولاتة بتحتوي على مستويات عالية من الكافيين والسكر، علشان كده هي مش أفضل اختيار قبل النوم، حتى "الدارك" منها، ولو نفسك في حاجة حلوة استبدلها بالموز أو الكريز.
الجبنة
بحتوي الجبنة خاصة الأنواع المالحة، على حمض اسمه "تيرامين"، بيساعد على الشعور باليقظة لفترات طويلة.
الشيبس
الإفراط في تناول رقائق البطاطس أو الشيبس، بيسبب جفاف الجسم، ويزود احتباس المياه، بالتالي بيؤدي للشعور بعدم الراحة، وتكرار التردد على التويلت، وبينصح الخبراء باستبدالها بالمكسرات الخالية من الملح.
الآيس كريم
السكريات العالية الموجودة في الآيس كريم، بتؤدي لرفع مستويات السكر في الدم، الأمر اللي بيأثر على الصحة بشكل كبير، وبيسبب الإحساس بعدم النوم بشكل كافي خلال الليل.
التوابل
ابعد عن الأطعمة السبايسي أو اللي بتحوي على توابل حارة قبل النوم، لإنها بترفع درجة حرارة الجسم، وبكده بيتم تعطيل عملية التنظيم الحراري في جسمك، وبتظهر مشكلة النوم المتقطع النوم.
