هتفضل المياه المشروب الوحيد اللي قادر يقضي على شعورنا بالعطش من غير مجهود، رغم وجود مشروبات كتير قدامنا، المياه كمان بقى ليها أنواع كتير، وكل فترة بنشوف أنواع مياه بخصائص معينة، لكن السؤال هنا ياترى المياه العادية ولا المعدنية ولا الفوارة.. مفيدة أكتر لصحتنا؟
أكدت دراسة حديثة، إن مياه "الحنفية" العادية اللي معظمنا فاكر إنها مش صحية، هي أفضل مياه للشرب، لأن نسبة خلوها من البكتيريا أكبر من المياه المعدنية، بشرط تكون المواسير الموصلة جيدة الصنع وغير قابلة للصدأ، أو متوصلة بجهاز "فلتر" علشان تكون نقية أكتر.
ووضحت كمان إن مش من الصحي نعتمد على شرب المياه الفوارة، كبديل للمياه العادية أو المعدنية، لأن خلوها من السكر، مش معناه أنها آمنة تمامًا، بالعكس الأحماض الموجودة فيها بتضعف مينا الأسنان.
ولو جينا بصينا على المياه المعدنية، صحيح هنلاقي فوائدها كتير، لصحة العظام والأعصاب والقلب، لكن في نفس الوقت ممكن تسبب انتفاخ في المعدة، أو تكون سبب على المدى البعيد للإصابة بالتسمم، لو تم تعبئتها في زجاجات بلاستيك ملوثة، ده غير إنها مكلفة لبعض الأشخاص. حسب الدراسة
وبما إنك قرأت الموضوع ده.. فا بنفكرك تشرب كوباية مياه حالًا.
