شوي اللحمة على الفحم، متعة طعمها بيختلف خلال أيام عيد الأضحى، ريحة الدخان بتاخدنا لعالم تاني، وتفتح نفسنا على الأكل، والأكيد إنها مرتطبة معانا بذكريات لذيذة، وإحنا حابين في المقال ده ندردش معاكم في الطرق الصحية لشوي اللحوم، حسب ما نشر موقع "اليوم السابع".

يالا بينا نعرفها:

1- تخلص من كل الدهون الموجوة في قطع اللحم، لإنها نزولها على الفحم بيتسبب في الدخان الكثيف، ومن هنا بتزيد الخطورة.

2- تبل اللحوم قبل الشوي لمدة 30 دقيقة عل الأقل، الخطوة دي مهمة جدًا في تسوية اللحمة وطعمها، وكمان بتقلل احتمالية الإصابة بالأمراض اللي بيسببها الفحم.

3- قطع اللحوم قطع صغيرة، وضيف على كل سيخ قطع خضار أو حتى فاكهة حسب الرغبة، وبكده تكون الوجبة متوازنة.

4- مهم أوي تكون درجة حرارة النار منخفضة، صحيح هتاخد وقت أطول، بس التسوية هتكون أفضل مع تقليل تكوين مواد ضارة.

5- استخدم شواية متعددة الطبقات، وخلي اللحوم في منتصف الشواية، مع التحريك المستمر علشان متتحرقش.

وأخيرًا.. حابين نقولكوا إن الشوي في الهواء الطلق بيقلل فرص الإصابة بالمشاكل الصحية. مقارنة بالشوي جوة البيت أو مكان مقفول، خاصة لمرضى القلب والحساسية.

بنتمنى ليكم حفلات شوي ممتعة.