الشتاء خلاص على الأبواب. وعشاقه بيستعدوا لممارسة كل الطقوس اللي بيحبوها، من أول لبس الكالسون للجري تحت المطر. طبعًا في الشتاء الأكل بيزيد، والكرش بيكبر. بس مشروبات الشتاء لها طعم خاص، بتستمتع بيها في كل الأوقات سواء جوة أو برة البيت. تعالوا نفكتر أهم المشاريب، اللي بتخلينا نستنى الشتاء على نار:

السحلب

الراعي الرسمي للسناجل، ما هو طالما مفيش حضن يبقا السحلب يقوم بالواجب. مش حوار يعني. بيدي باور وبيقلل التوتر والقلق.

حمص الشام

مفيش أحلى من كوباية حمص شام سبايسي، وقعدة بالليل على كورنيش النيل. هتحس كده اتغسلت من جوة ومقبل على الحياة أكتر، جرب مش هتندم.

البليلة

بعيد عن كونها بتدفي الجسم جدًا، البليلة لها فوائد صحية عظيمة، أهمها حرق الدهون. غير إنها هتحسسك بالشبع لفترة طويلة. وكمان بتمنع الإصابة بنزلات البرد.

الكاكاو 

الدراسات أثبتت إن مزاج الناس في الشتاء بيكون مش أحسن حاجه، وكتير بيدخلوا في اكتئاب موسمي. هنا بقى يجي دور كوباية الكاكاو أو الهوت شوكليت، هتظبط المزاج وتعلي هرمونات السعادة في الجسم. يعني هتتدفى وتتبسط في نفس الوقت.

شوربة العدس

سواء حبيتها أو لأ ماتقدرش ننكر فوائدها، بتحسن صحة العظام اللي بتتأثر بالجو البارد. ده غير احتوائها على نسبة كبيرة من الحديد، اللي بيقوي الجهاز المناعي. وبتحميك من الإصابة بفيروسات الأنفلوانزا.