لعشاق السينما والمهتمين بمتابعة الأفلام الجديدة، استعدوا الأسبوع ده وبداية من النهارده لمشاهدة فيلم "11 11" وكمان فيلم " حامل اللقب" في أغلب دور العرض السينمائية في القاهرة.
يلا نعرف تفاصيل أكتر عن الفيلمين:
فيلم "11 11"
أحداث الفيلم ليها نصيب من اسمه، الساعة 11 و11 دقيقة بيحصل حدث رئيسي لشخصية من الشخصيات الـ 5 المهمة في الفيلم، فبدون قصد منه بيورط معاه أشخاص مالهومش ذنب، وبتتصاعد الأحداث وسط جو من الغموض والإثارة.
التصنيف العمري للفيلم من سن 12 سنة لأكبر، بيشارك في البطولة غادة عادل، إياد نصار، محمد الشرنوبي، هند عبدالحليم، عمر الشناوي، وإنجي المقدم، وعدد من الوجوه الجديدة. تأليف ياسر عبد الباسط، وإخراج كريم أبوزيد.
فيلم "حامل اللقب"
"يحيى" لاعيب كرة القدم وزوجته "مسك" اللي بتشتغل طبيبة أمراض نساء، نفسهم يخلفوا طفل من سنين، وفي إطار من الفانتازيا بتحصل حاجه في وقت غير مناسب، وبيلاقوا نفسهم في مواجهة موقف صعب، بيحاولوا يلاقوله حل بطريقة كوميدية.
الفيلم بطولة دينا الشربيني، هشام ماجد، محمد سلام، أحمد فتحي، محمد كيلاني، محمد ثروت، دنيا ماهر، ليلى عز العرب، ويزو، وظهور خاص للفنان عماد رشاد. تأليف إيهاب بليبل، وإخراج هشام فتحي.
مستنيين رأيكم في الفيلمين!