بيصادف النهارده، 27 إبريل، مرور 90 سنة على ميلاد الفنانة الراحلة سناء جميل. واحدة من أهم عمالقة الفن وأكثر عشاقه. واللي مشوراها الفني كان مليان معارك، خرّجت موهبة مايختلفش عليها اثنين. حبيناها في دور الهانم والمعلمة والصعيدية وكمان الفلاحة. من الفنانات اللي لها طلة وأداء خاصة بها لوحدها، ماحدش قدر ينافسها فيه. ده غير خامة صوت تميزها من بين الكل. تعالوا نعرف أكتر عن الجميلة.. سناء جميل:
- اتولدت يوم 27 أبريل سنة 1930 في محافظة المنيا. واسمها الحقيقي"ثريا يوسف عطالله".
- انتقلت مع أسرتها للقاهرة، والتحقت بمدرسة المرديديو الفرنسية الداخلية. وهناك وقفت للمرة الأولى على خشبة المسرح.
- درست في المعهد العالي للفنون المسرحية. لما أهلها عرفوا بدخولها مجال التمثيل، حصلت مشاكل كبيرة انتهت بطردها من البيت.
- عرف المخرج زكي طليمات بالأمر، وكان وقتها مدير المعهد. فوَفر لها مسكن في بيت الطلبات و6 جنيه لتمثيلها على مسرح المعهد. واختار لها اسم "سناء جميل". واتخرجت من المعهد سنة 1935.
- عملت بالمشغولات اليدوية جنب شغلها في المسرح، وظهرت لأول مرة على شاشة السينما سنة 1951 في فيلم "حكم القوي".
- رشحها المخرج صلاح أبو سيف لدور نفيسة في فيلم "بداية ونهاية" سنة 1960، بعد ما رفضته الفنانة فاتن حمامة. وهنا ظهرت موهبتها الحقيقة وحققت شهرة كبيرة، وانهالت عليها العروض.
- اتجوزت الكاتب الصحفي لويس جريس سنة 1961، بعد قصة حب قوية. ورحلت عن عالمنا في 22 ديسمبر 2002.
- قدمت سناء جميل حوالي 180 عمل فني اتنوعت بين السينما والمسرح والإذاعة والتليفزيون، وحصلت سنة 1967 على وسام العلوم والفنون.
- شاركت في 4 أفلام اتصنفوا ضمن قائمة أفضل 100 فيلم، في ذاكرة السينما المصرية. وده حسب استفتاء النقاد سنة 1996. وهم: بداية ونهاية، المستحيل، الزوجة الثانية، زينب 1952.
