حالة من الحزن الشديد بتعيشها الإعلامية ريهام سعيد، بعد عملية تجميل شوهت وجهها على يد دكتور تجميل لبناني، اضطرت بسببها تدخل في دوامة عمليات تانية، علشان تصلح أخطاء العملية الأولى، حسب كلامها، والأمر وصل بينهم للقضاء، تابعوا السطور الجاية هتعرفوا القصة كلها.

الحكاية ببساطة حسب كلام الإعلامية الشهيرة على السوشيال ميديا، إنها قبل 11 شهر راحت لطبيب تجميل من لبنان، علشان تحسن من وجهها بعد سقوطه نتيجة نزولها في الوزن بشكل كبير، واتفقوا إنه مش هيقرب من منطقة العين، لكن بعد العملية اكتشفت إنه فتح بالمشرط حول المنطقة وخيطها، وملاها بمادة الفلير بطريقة خاطئة، وده أدى لمضاعفات خطيرة اتسببت في تغير ملامحها بالكامل.

ريهام قالت إنها بتتعالج من آثار العملية الأولى بقالها 3 شهور، وإن الفلير لو اتشال من المنطقة دي هيكون مكانه حفرة كبيرة وخطوط جنب عنيها، مش بس كده كشفت إنها اتعرضت لحرق في عنيها خلال العملية وقالت: "أنا عيني باظت.. وعيني اللي بتلف لوحدها دي عندي بيها مستندات".

وفي نفس السياق، نشر  الدكتور نادر صعب بيان عبر صفحته على "فيسبوك"، بيقول فيه إنه هيتخذ كل  الإجراءات القانونية ضد الإعلامية والمحطة التليفزيونية اللي ظهرت فيها، واعتبر الأخبار المتداولة ملهاش أساس لها من الصحة.

انقسمت آراء المتابعين على السوشيال ميديا بعد ما شافوا حالة ريهام سعيد، منهم اللي تعاطف معاها ودعالها بالشفاء، ومنهم كمان اللي شاف إنه غلطتها من البداية وإن عمليات التجميل مجرد تريند، بتضر الوجه على المدى البعيد أكتر ما بتفيده.