مع انطلاق السباق الرمضاني، ظهر كام تريند قلب السوشيال ميديا، معظمها عن المسلسلات والإعلانات اللي اتعرضت في التليفزيون لحد دلوقتي.
تعالوا نعرف مع بعض أكتر حاجات شدت المصريين:
شطارة ياسر جلال
حالة من الدهشة والإعجاب حسينا بيها كلنا، وإحنا بنتفرج على مسلسل "الاختيار3"، لما شوفنا ياسر جلال بيجسد شخصية رئيس الجمهورية عبد الفتاح السيسي قبل رئاسته للبلاد، مشيته، تعبيرات وشه، وحتى صوته! الحقيقة ومن أول حلقة ياسر جلال يستحق جائزة أحسن ممثل في رمضان 2022.
شباب عمرو دياب
البريد المصري اختار عمرو دياب علشان يكون بطل إعلانه، الهضبة غنى "السر" وسابنا كده مش عارفين السر ورا رشاقته ولياقته، بس اللي عارفينه كويس إنه هيفضل في الصورة حدوتة أسطورة. (زي ماقال في الأغنية).
العسيلي ودع بنك مصر
بعد سلسلة إعلانات ناجحة قدمها محمود العسيلي مع بنك مصر، استملت منه الراية شيرين، وشارك العسيلي مع روبي في إعلان رايق لأجهزة فريش، إخراج تامر مهدي.
شيرين بتقول يا معافر ولاحاجة تانية؟!
رغم إن كلمة "يـا معـافر" مكتوبة بالبنط العريض في أول الإعلان، بس ناس كتير سمعتها يا معفن! عمومًا صوت شيرين عظمة والأغنية كلها بكلماتها ولحنها بتدينا طاقة إيحابية ودعم، كعادة إعلانات بنك مصر. (وبالمناسبة مش هنزعل لو شيرين مسكت حملتهم لكام سنة قدام).
سمير غانم ودلال عبد العزيز وكريمة مختار وسامي العدل ووحيد حامد "أنستونا"
قرر صناع 5 مسلسلات السنة دي يهدوا أعمالهم لـ 5 نجوم عايشين في قلوبنا، فأسرة مسلسل "الاختيار 3" أهدت العمل لروح الكاتب وحيد حامد، وشوفنا إهداء لروح الفنان سامي العدل في تتر نهاية مسلسل "أحلام سعيدة"، واستعان مخرج مسلسل "راجعين يا هوا" بصورة للفنانة الراحلة كريمة مختار ضمن الأحداث كشخصية من قرايب وفاء عامر.
ومع انطلاق الحلقة الأولى لمسلسل" الكبير 6"، شوفنا الجملة دي: "إهداء إلى من أضحكنا وعلمنا الضحك الأستاذ سمير غانم"، كمان ضم تتر أغنية مسلسل "في بيتنا روبوت ٢" إهداء لروح الفنانة القديرة دلال عبد العزيز، وكتبوا: "إهداء إلى روح الأم العظيمة والفنانة الكبيرة وأول من دعم هذا العمل دلال عبد العزيز".
لذاذة إعلان ياسمين عبد العزيز وكريم محمود عبد العزيز
ميكس كوميدي مش متوقع خالص، جسد الثنائي شخصيات فنية كتير بنحبها، والحقيقة إن صورة الإعلان وألوانه مبهبرة والأغنية كمان.
محمد رمضان ودينا الشربيني في رمضان بصوت عمرو مصطفى
ناس كتير رن في ودانها صوت الملحن عمرو مصطفى في الفيديو المشهور وهو بيقول باستغراب في رمضان؟! بعد لما شافوا مشهد رومانسي جرئ شوية جمع بين محمد رمضان ودينا الشربيني في المطبخ، وبعيد عن ده المسلسل بدايته قوية ومتصور باحترافية.
