أصدرت النيابة العامة بيان رسمي أكدت خلاله إن أي اعتداء أو عبث بالحيوانات مش مجرد تصرف مستهجن، لكن جريمة كاملة الأركان يعاقب عليها القانون، ومش هيكون فيه أي تهاون مع مرتكبيها.

ووضحت إن الموقف ده مش قانوني بس، لكنه كمان نابع من قيم دينية وإنسانية وأخلاقية بتمنع إيذاء الحيوان أو التعدي عليه بأي شكل.

النيابة كمان اتكلمت في البيان عن ظهور مشاهد قاسية ضد الحيوانات مؤخرًا على السوشيال ميديا، سببت استياء كبير وسط المواطنين، وعشان كده فتحت تحقيقات فورية مع كل المتورطين في الوقائع دي.

وأكدت النيابة إن تدخلها السريع هدفه الأساسي تحقيق الردع العام، وإنها مش هتقبل بأي تصرفات تهدد منظومة الرحمة والإنسانية اللي المجتمع المصري قائم عليها.

ودعت الناس إنهم ما يتجاهلوش الموضوع، ولازم يبلغوا فورًا عن أي واقعة اعتداء على الحيوانات يشوفوها، سواء في الشارع أو على السوشيال ميديا، عشان يتم اتخاذ الإجراءات القانونية اللازمة فورًا.

تقدر تبعت بلاغ على رقم الواتساب الخاص بالنيابة العامة: (01229869384)، بالفيديو أو صور أو حتى وصف مكتوب.