مقاييس الجمال كتيرة ومختلفة، سواء شكل أو لون أو ملامح وغيرهم. وفي الآخر الموضوع نسبي والآراء عليه بتختلف. بس دايمًا بنسمع جملة "السمار نص الجمال". وفي الحقيقة الجملة دي تقريبًا مايختلفش عليها اتنين. وفي فنانين معروفين دلوقتي، جمالهم في سمارهم. دول يخلوك تقول السمار مش بس نص الجمال.. لأ ده الجمال كله.
تعالوا نشوف أجمل مشاهير الفن السُمر:
روبي
من أول ظهورها في الألفينات لفتت أنظار كل الناس. ملامحها شرقية وبشرتها السمراء، خلت جمالها له مذاق خاص. وبقت أيقونة للجمال عند ناس كتيرة.
شيرين عبد الوهاب
من النجمات اللي بيتمتعوا بجمال طبيعي وبشرة سمرا مصرية أصيلة. وملامحها البسيطة زودت جمالها.
دينا الشربيني
دي حكاية لوحدها. مش بس سمار وجمال روحها، دي كمان روحها حلوة. دينا مش من هواة المكيب ودايمًا ضحكتها منورة وشها. ملامحها جذابة وجميلة، وعلى الكلام ده في ألف دليل.
أسماء أبو اليزيد
لونها وملامحها بيخطفوا العين من أول طلة. تدخل القلب بسرعة وبدون استأذان. في وقت قليل اسمها بقى معروف بين فنانات جيلها. وبتثبت إن السمار هو كل الجمال وزيادة. وتأكد لنا أن كل ما هو أسمر جميل، زي الشكولاتة والقهوة.
ناهد السباعي
شكلها يخطفك، صعب تروح من بالك. أما بشرتها السمراء اللامعة دي أكتر حاجه بتميزها، وتخلي العين متعلقة عليها. ناهد بتغير في ستايلها كتير من وقت للتاني، وسمراها دايمًا مخليها حلوة.
مرام محمد
فنانة بطعم الشيكولاتة. ضحكتها مبهجة، وصوتها ياخدك بعيد عن زحمة القاهرة للنوبة الطيبة، مكان نشأتها. مرام من الفنانات بدأت تظهر على الساحة مؤخرًا. وبتنافس بصوتها القوي، اللي مايقلش عن جمالها المتميز.
