حالة من الجدل سببها فيلم "بشتقلك ساعات"، بعد عرضه في مهرجان برلين السينمائي في دورته الـ 72، بسبب قصته اللي بتناقش أوضاع المثليين في الوطن العربي من خلال علاقة عاطفية بين رجلين، بيطرحها مخرج مصري!
في السطور الجاية هنعرف تفاصيل أكتر عن الفيلم:
1- "بشتقلك ساعات" الفيلم الوحيد اللي بيمثل مصر في مهرجان برلين السنة دي.
2- مدة الفيلم 66 دقيقة، إنتاج "مصري لبناني ألماني"، أحداثه كلها اتصورت في برلين.
3- بتدور أحداثه عن قصة حب بتنشأ بين رجلين، بالإضافة لـ حكايات وقصص تراثية وشعبية عربية، بيتم خلالها استبدال المرأة بالرجل في العلاقات.
4- محمد شوقي حسن، مخرج مصري عايش في ألمانيا، هو اللي قام بإخراج الفيلم، وبيقول إنه حاول يلاقي طرق مختلفة علشان يجدد بيها النظرة للمثليين، واستخدم أساليب الحكاية التقليدية واللغة المختلفة المتجذرة في الثقافة العربية الشعبية.
5- بيشارك أحمد الجندي، ممثل مصري، بشخصية البطل الرئيسي، وبتحصل خلافات مع حبيبه الشاب؛ بسبب علاقاته المتعددة وخيانته ليه. كمان الفنانة المصرية دنيا مسعود، بتشارك بدور الراوي على طريقة "شهرزاد" في حكايات "ألف ليلة وليلة".
6- بيضم الفيلم أغاني عربية مشهورة زي "مش أنانية" لميريام فارس، وأغنية "في حاجات" لنانسي عجرم، وأغنية "يا حبيبي لا" لعمرو دياب.
7- الشاعر عماد حسن، مؤلف أغنية "بشتقلك ساعات" للمطربة سميرة سعيد، أعلن رفضه لاستخدام اسم أغنيته بدون إذنه في فيلم بيروج للمثلية الجنسية، وأكد إنه هيلجأ للقانون علشان يحصل على حقوقه الإبداعية والفنية.