النهارده، 8 فبراير، بيصادف ذكرى ميلاد واحدة من أهم الأصوات والمواهب التمثيلية في السينما المصرية والعربية، وبالمناسبة دي قرر "جوجل" باعتباره محرك البحث الأشهر في العالم الاحتفال بيها ووضع صورتها على شاشته الرئيسية، وإحنا كمان هنعرفكم على 5 مواقف بيثبتوا إن دلوعة السينما حياتها ماكنتش كلها دلع:

زواج غير مستقر

اتجوزت شادية 3 مرات في حياتها، الأولى من الفنان عماد حمدي، والثانية من مهندس الصوت عزيز فتحي، والثالثة من الفنان صلاح ذو الفقار اللي انفصلت عنه سنة 1969.

حلم الأمومة

بحسب تصريحات الفنان الكبير "سمير صبري"، شادية كان نفسها تكون أم، ورغم حملها 3 مرات من زوجها الفنان الراحل صلاح ذو الفقار، لكن الحمل ماكنش بيكتمل في كل مرة، علشان كده كانت بتعتبر شقيقها "طاهر" ابنها.

موت شقيقها

من أصعب المواقف اللي اتعرضت لها شادية، كان موت أخوها الكبير "طاهر" بشكل مفاجئ، واللي كانت بتعتبره صديقها المخلص ورفيق رحلتها وابنها، والأصعب إنها معرفتش تحزن لإنها كانت بتجسد وقتها دورها في مسرحية "ريا وسكينة"، وحصلت على يوم إجازة واحد بس.

تشخيص غلط  لمرضها

بعد مرضها الشديد، سافرت شادية لأختها عفاف في الولايات المتحدة الأمريكية، وهناك تم تشخيص مرضها بإنه سرطان الثدي، وأجرت جراحة استئصال للثدي، وبعد رجوعها مصر اكتشفت أن التشخيص ماكنش صح وطبعًا الأمر ده سبب لها حزن كبير باقي حياتها.

اعتزالها الفن

في وقت من الأوقات، عاشت شادية فترة من عدم الراحة، وسيطر عليها الإحساس بالقلق خلال مشوارها الفني، وقررت الاعتزال والتفرغ للعبادة ورعاية الأطفال الأيتام، واتبرعت ببيتها علشان يكون مركز لأبحاث علاج السرطان.