"قلبي ومفتاحه"
مسلسل "قلبي ومفتاحه" بيحكي عن قصة "المحلل" والأمة الكبيرة اللي بتواجه الست بعد طلاقها 3 مرات، واللي بتضطرها تدور على محلل علشان ترجع لجوزها تاني، القصة بتبدأ برحلة أوبر، السواق هو آسر ياسين، واللي بيحس بانجذاب ناحية مي عز الدين، وبعدها هي بتعرض عليه الجواز، ومن هنا الأحداث بتتغير بشكل مش متوقع.
المسلسل مكون من 15 حلقة، وبيشارك في بطولته دياب، أشرف عبد الباقي، أحمد خالد صالح، سما إبراهيم، حازم سمير، عايدة رياض، وتقى حسام، وهو من تأليف وإخراج تامر محسن.
"إخواتي"
مسلسل "إخواتي" بيحكي عن العلاقات المعقدة بين 4 أخوات، بيواجهوا تحديات وصراعات عائلية وحياتية كبيرة، بجانب المشاكل النفسية اللي بتأثر على علاقتهم ببعض.
المسلسل بطولة نيللي كريم، روبي، كندة علوش، جيهان الشماشرجي، ومعاهم حاتم صلاح، نبيل عيسى، علي صبحي، إسلام حافظ وغيرهم، ومن إخراج محمد شاكر خضير وتأليف مهاب طارق.
"لام شمسية"
بطولة أمينة خليل بيحكي عن قضايا المرأة، وبيناقش لموضوعات اجتماعية مهمة زي التعدي على الأطفال، وبيتناول القضية بشكل توعوي في إطار درامي مشوق، وإزاي المجتمع والستات تحديدًا ممكن يواجهوا التحديات دي، المسلسل بيعكس صورة من معاناة الستات في مجتمعنا وبيطرح تساؤلات مهمة حوالين القضايا اللي بتأثر على حياتهم.
المسلسل من تأليف مريم نعوم، وإخراج كريم الشناوي، وإنتاج Media Hub سعدي- جوهر، وبطولة أمينة خليل، أحمد السعدني، محمد شاهين، يسرا اللوزي، ثراء جبيل، صفاء الطوخي، فاتن سعيد، وعدد تاني من النجوم
"عايشة الدور"
دنيا سمير غانم بتخوض رمضان 2025 بمسلسل "عايشة الدور"، اللي بيرصد معاناة المرأة المطلقة وتحدياتها في تربية أولادها، بتجسد دنيا دور أم مطلقة عندها طفلين، وبتواجه صعوبات كتير، لكن حياتها بتاخد شكل جديد لما بتقرر ترجع الجامعة وتكمل تعليمها في المجال اللي بتحبه، وبتبدأ رحلة جديدة في حياتها.
المسلسل 15 حلقة، بطولة دنيا سمير غانم، محمد ثروت، سماء إبراهيم، محمد كيلاني، رحاب الجمل، أميرة أديب، وفدوى عابد، ومن تأليف كريم يوسف، أحمد الجندي، أشرف نصر، ندى عزت، سامح جمال، نانسي عكيلة، وإخراج أحمد الجندي، وإنتاج محمد أحمد السبكي.
"حسبة عمري"
بيتكلم عن الترابط الأسري وحقوق المرأة بعد الطلاق، القصة بتبدأ بعد 20 سنة جواز، لما ست بسيطة جوزها بيطردها من البيت، فبتلاقي نفسها في الشارع ليلة كاملة، وبتقرر بعدها تطالب بحقها في "الكَدّ والسعاية"، وبالفعل بتاخد نص ممتلكاته بعد سنين التعب معاه، وبيبدأ صراع طويل بينهم!
المسلسل بطولة روجينا، محمد رضوان، عمرو عبد الجليل، علي الطيب، محمود البزاوي، نادين، نور قدري، عمر زريق، إسلام إبراهيم وغيرهم، ومن تأليف محمود عز وإخراج مي ممدوح.
"الأميرة- ظل الحيطة"
ياسمين صبري بتقدم في رمضان 2025 مسلسل "الأميرة - ظل حيطة"، اللي بيتكلم عن قضايا المرأة والتسرع في الجواز بسبب الفلوس، القصة بتدور حول زينب (ياسمين صبري)، اللي بتتجوز أسامة (نيقولا معوض) بعد ما أهلها يوافقوا عليه بسبب وضعه المادي ومثاليته اللي بيظهرها، لكنها بعد الجواز بتكتشف حقيقته، وبتتحول حياتها لجحيم!
المسلسل مستوحى من قصة حقيقية، 15 حلقة، سيناريو وحوار محمد سيد بشير، إخراج شيرين عادل، وبطولة ياسمين صبري، نيقولا معوض، وفاء عامر، مها نصار، هالة فاخر، هند عبد الحليم، عابد عناني، أحمد جمال سعيد، هاجر عفيفي، سمر مرسي، عزت زين، محمد دسوقي وغيرهم.
