"أول ساعة هروقك، تاني ساعة هشوقك، تالت ساعة هدوقك إزاي قلبي بيعشقك".. ده جزء من كلمات أغنية روبي الجديدة "3 ساعات متواصلة"، اللي عرضتها لهجوم شديد بمجرد طرحها من يومين على قناتها الرسمية على يوتيوب، لإن ألفاظها خادشة للحياء وتثير الغرائز (حسب كلام البعض).
في الوقت ده، انتشرت أخبار بتقول إن نقابة الموسيقيين عقدت اجتماع مخصوص، علشان تاخد إجراء ضد صناع الأغنية، لكن خرج النقيب مصطفى كامل ونفى كل الكلام ده، وأكد إن النقابة ملهاش دخل أو رقابة على الأغنية، والأمر كله بيرجع للمصنفات الفنية.
على الجانب التاني، هاجم الناقد طارق الشناوي نقابة الموسيقيين، وكتب "بوست" على فيسوك قال فيه إنه سمع الأغنية أكتر من مرة ومفيهاش ألفاظ خارجة، وإنه مستغرب النقابة وإنها بتمنع كل ما هو مبهج في الحياة.
أما مؤلف عزيز الشافعي، قال في مداخلة هاتفية مع الإعلامي عمرو أديب، في برنامج "الحكاية": "مفيش أي كلمة فيها إيحاءات، إلا لو شخص عايز يفكر كده، ولا كلمة أروقك أو أشوقك أو أدوقك فيها إيحاءات، وإذا كانت كلمة أدوقك أكثر كلمة الناس إتكلمت عليها فأحمد شفيق كامل قالها في أغنية إنت عمري لأم كلثوم"دوق معايا الحب دوق"، ونجاة غنت في أغنية لمرسي جميل عزيز دوق 3 مرات، أنا كتبتها مرة واحدة فقط، لكن اللي عايز يفكر شمال هيفكر".
لحد وقت كتابة المقال الكليب تريند يوتيوب، ومحقق أكتر من 268 مليون مشاهدة على الموقع نفسه.
