رمضان 2025 جاي ومعاه حكايات جديدة عن العلاقات السامة أو التوكسيك زي ما بنسميها دلوقتي، خيانة، استغلال، سيطرة، وغيرها من المشاكل اللي ممكن تحول العلاقات لجحيم أو تنهيها خالص، وده بعد ما تكون قضت على أطرافها.
تعالوا نشوف رمضان السنة دي بيقولنا إيه عن العلاقات!
بنشوف البنت اللي بتستغل حبيبها علشان يصرف عليها، وكل فترة تطلب منه فلوس علشان تعالج بيها أخوها، وطبعًا كلامها مش حقيقي، والأصعب من كده إنه لما احتاجلها وهو بيمر بموقف صعب، اتهربت منه!
إش إش ومختار (إش إش )
شاب بيطلب من حبيبته الزواج في السر علشان أهله رافضينها، وبتكتشف إنه خدعها بورقة زواج مزورة، بمساعدة خاله اللي عمل نفسه مأذون، ولما بتعرف الحقيقة وبتواجه، يقلب عليها الترابيزة وبيتهمها بإنها عاملة عليه لعبة، وبيطردها من بيته.
ليل ويوسف (وتقابل حبيب)
زوج بيتجوز على مراته وبيخلف، كل ده من غير ما يقولها، ومع الوقت والمواقف والمراقبة، بتظبطه في بيت تاني مع زوجته الجديدة، وبتحصل خناقة ين الزوجتين، فا الزوجة التانية بتطرد الأولى وهو واقف يتفرج.
زينب وأسامة (الأميرة)
شاب توكسيك من العيار الثقيل، بيدخل لحبيبته من نقط ضعفها، وبعد ما بيسيطر عليها، يبدأ يبعدها عن أهلها وشغلها وحياتها اللي كانت عايشاها قبله، وكمان ييحاول يحسسها إنها مجنونة وبتشوف حاجات مش حقيقية.
أسعد وميار (قلبي ومفتاحه)
زوج متسلط لأبعد الحدود، بيحصل انفصال بينه وبين زوجته، وبيبدأ معاها سلسلة ابتزاز بابنهم الوحيد، خاصة إنهم اتطلقوا 3 مرات، فا بتضطر تشوف راجل تاني تتجوزه كـ محلل، علشان تقدر ترجع لزوجها الأولاني، ووسط مواقف كتير متعرفش مين فيهم اللي توكسيك ميار ولا أسعد؟
